[Lectio1]
De libro primo Machabæórum
!1 Mac 2:19-22
19 Et respóndit Mathathías et dixit magna voce: Etsi omnes gentes regi Antíocho obédiunt, ut discédat unusquísque a servitúte legis patrum suórum, et conséntiat mandátis ejus:
20 ego et fílii mei, et fratres mei, obediémus legi patrum nostrórum.
21 Propítius sit nobis Deus, non est nobis útile relínquere legem et justítias Dei:
22 non audiémus verba regis Antíochi, nec sacrificábimus transgrediéntes legis nostræ mandáta, ut eámus áltera via.

[Responsory1]
@Tempora/101-0:Responsory7

[Lectio2]
!1 Mac 2:23-26
23 Et, ut cessávit loqui verba hæc, accéssit quidam Judǽus in ómnium óculis sacrificáre idólis super aram in civitáte Modin, secúndum jussum regis.
24 Et vidit Mathathías et dóluit, et contremuérunt renes ejus, et accénsus est furor ejus secúndum judícium legis, et insíliens trucidávit eum super aram.
25 Sed et virum, quem rex Antíochus míserat, qui cogébat immoláre, occídit in ipso témpore, et aram destrúxit:
26 et zelátus est legem, sicut fecit Phínees Zamri fílio Salómi.

[Responsory2]
@Tempora/101-1:Responsory2

[Lectio3]
!1 Mac 2:27-30
27 Et exclamávit Mathathías voce magna in civitáte, dicens: Omnis qui zelum habet legis státuens testaméntum éxeat post me.
28 Et fugit ipse, et fílii ejus in montes, et reliquérunt quæcúmque habébant in civitáte.
29 Tunc descendérunt multi quæréntes judícium et justítiam in desértum.
30 Et sedérunt ibi ipsi, et fílii eórum, et mulíeres eórum, et pécora eórum, quóniam inundavérunt super eos mala.

[Responsory3]
@Tempora/101-1:Responsory3