[Officium]
Commemoratio Ss. Martyrum et aliorum Sanctorum, quorum Reliquiæ in Ecclesiis Nostri Ordinis asservantur

[Rank]
;;Duplex majus;;4;;ex C3

[Rule]
12 lectiones

[Hymnus Vespera]
Adéste Sancti plúrimo
Dum thure, vestra dum piis
Colúntur ossa rítibus,
Votis favéte súpplicum.
_
Non illa, quamquam trístibus
Imum redáct[a] in púlverem
Dudum sepúlchris squálleant,
Divína virtus déserit.
_
Sed sancta præsénti fovet
Implétque templa númine,
Sed et futúræ spíritus
Post sæcla servat glóriæ.
_
Hinc ille, qui nostris latet
Cinis sub aris cónditus,
Aegris medétur éfficax,
Torquet, fugátque dǽmones.
_
Glória tibi Dómine,
Qui surrexíst[i] a mórtuis,
Cum patr[e] et sancto Spíritus,
In Sempitérna sǽcula.
Amen.

[Nocturn 1 Versum]
V. Dórmiunt in terræ púlvere.
R. Evigilánunt in vitam ætérnam.

[Versum 1]
V. Custódit Dóminus ómnia ossa eórum.
R. Unum ex his non conterétur.

[Oratio]
Deus, qui hanc sacrosánctam ecclésiam tot voluísti Sanctórum decorári Relíquiis: auge in nobis resurrectiónis fidem; et fac nos immortális glóriæ partícipes, cujus in eorum cinêribus pígnora venerámur.
$Per Dominum

[Lectio1]
!Ap 6:9-11
9 Vidi subtus altáre ánimas interfectórum propter verbum Dei, et propter testimónium, quod habébant:
10 et clamábant voce magna, dicéntes: Usquequo Dómine (sanctus et verus), non júdicas, et non víndicas sánguinem nostrum de iis qui hábitant in terra?
11 Et datæ sunt illis síngulæ stolæ albæ: et dictum est illis ut requiéscerent adhuc tempus módicum donec compleántur consérvi eórum, et fratres eórum, qui interficiéndi sunt sicut et illi.

[Lectio2]
!Ap 7:14-17
14 Hi sunt, qui venérunt de tribulatióne magna, et lavérunt stolas suas, et dealbavérunt eas in sánguine Agni.
15 Ideo sunt ante thronum Dei, et sérviunt ei die ac nocte in templo ejus: et qui sedet in throno, habitábit super illos:
16 non esúrient, neque sítient ámplius, nec cadet super illos sol, neque ullus æstus:
17 quóniam Agnus, qui in médio throni est, reget illos et dedúcet eos ad vitæ fontes aquárum, et abstérget Deus omnem lácrymam ab óculis eórum.

[Lectio3]
!Ap 12:9-12
9 Et projéctus est draco ille magnus, serpens antíquus, qui vocátur diábolus, et Sátanas, qui sedúcit univérsum orbem: et projéctus est in terram, et ángeli ejus cum illo missi sunt.
10 Et audívi vocem magnam in cælo dicéntem: Nunc facta est salus, et virtus, et regnum Dei nostri, et potéstas Christi ejus: quia projéctus est accusátor fratrum nostrórum, qui accusábat illos ante conspéctum Dei nostri die ac nocte.
11 Et ipsi vicérunt eum propter sánguinem Agni, et propter verbum testimónii sui, et non dilexérunt ánimas suas usque ad mortem.
12 Proptérea lætámini cæli, et qui habitátis in eis.

[Lectio4]
!Ap 14:9-12
9 Si quis adoráverit béstiam, et imáginem ejus, et accéperit charactérem in fronte sua, aut in manu sua:
10 et hic bibet de vino iræ Dei, quod mistum est mero in cálice iræ ipsíus, et cruciábitur igne, et súlphure in conspéctu angelórum sanctórum, et ante conspéctum Agni:
11 et fumus tormentórum eórum ascéndet in sǽcula sæculórum: nec habent réquiem die ac nocte, qui adoravérunt béstiam, et imáginem ejus, et si quis accéperit charactérem nóminis ejus.
12 Hic patiéntia sanctórum est, qui custódiunt mandáta Dei, et fidem Jesu.

[Nocturn 2 Versum]
V. Justi quasi virens fólium germinábunt.
R. Non commovébitur radix eorum.

[Lectio5]
Sermo sancti Bernárdi Abbátis
!Sermo 5 in Festo omn.Sanct.n.5-7 et 9
Quamquam, dilectíssimi, honórum nostrórum Sancti non egent, nec quidquam eis nostra devotióne præstátur; plane, quod eórum memóriam venerámur, nostra ínterest, non ipsórum. Vultis scire, quantum ínterest nostra? Ego in me, fáteor, ex hac recordatióne séntio desidérium véhemens inflammári, et desidérium triplex. Primum desidérium, quod in nobis Sanctórum memória vel éxcitat, vel íncitat magis, hoc est, ut eórum tam optábili societáte fruámur, et mereámur concíves et contubernáles esse Spirítuum beatórum, et collætári communióne Sanctórum.

[Lectio6]
Singulórum vero recordatiónes, quasi scintillæ síngulæ, immo quasi ardentíssimæ faces, devótos accéndunt ánimos, ut eórum et conspéctum sítiant et compléxum, ádeo, ut plerúmque étiam inter eos esse se réputent, modo ad omnes simul, modo ad hos, vel ad illos tota aviditáte et veheméntia corda vibrántes. Non tantúmmodo societas, sed étiam felícitas nobis est optánda Sanctórum: glóriam quoque ferventíssimo stúdio ambiámus. Hoc ergo secúndum desidérium, quod ex Sanctórum commemoratióne flagrat in nobis, ut sicut illis, sic nobis étiam Christus appáreat vita nostra, et nos quoque cum ipso appareámus in glória.

[Lectio7]
!n. 10-11
Sane, ut eam glóriam nobis sperare liceat, et ad tantam beatitúdinem aspiráre, summópere nobis desideránda sunt suffrágia quoque Sanctórum: ut, quod possibílitas nostra non obtinet, eórum nobis intercessióne donétur. Miserémini mei, miserémini mei, saltem vos, amíci mei. Nostis ipsi perículum nostrum, nostis ignorantiam nostram, dolos adversariórum, nostis eórum ímpetus, et nostram fragilitátem. Vobis enim loquor, qui in eádem tentatióne fuístis, qui eósdem superástis conflíctus, eósdem láqueos evasístis, qui didicístis ex his, quæ passi estis, compassiónem. Amplióri fidúcia ad vos confúgio, vos hábeo in ipsa humanitáte consórtes, ut opórteat vos familiárius et speciálius miseréri ossi de óssibus vestris, et carni de carne vestra.

[Lectio8]
Dénique transeuntes ex hoc mundo ad Patrem, sancta nobis pígnora reliquerunt. Apud nos síquidem córpora eórum in pace sepúlta sunt, quorum nómina vivent in sæculum, id est, quorum numquam glória sepelítur. Absit, absit a vobis, ánimæ sanctæ, Ægýptia illa crudélitas pincérnæ Pharaónis, qui in gradum prístinum restitútus, statim oblítus est Joseph sancti, qui in cárcere tenebátur; non enim erant uníus cápitis membra, nec áliqua pars fidéli cum infidéli, aut ulla societas Israëlítæ ad Ægyptium, non plus quam luci ad ténebras. Interpretátur enim Ægýptus ténebræ, Israël autem Videns Deum: atque ídeo, ubicúmque Israël erat, lux erat. Hæc vero nostra et Sanctórum cohæréntia est, ut nos congratulémur eis, ipsi compatiántur nobis: nos devóta meditatióne regnémus in eis, ipsi in nobis et pro nobis mílitent pia interventióne.

[Nocturn 3 Versum]
V. Cum Christus apparúerit, vita vestra.
R. Tunc et vos apparébitis cum ipso in glória.

[Lectio9]
Léctio sancti Evangélii secúndum Lucam
!Luc 6:17-23
In illo témpore: Descéndens Jesus de monte, stetit in loco campéstri, et turba discipulórum ejus, et multitúdo copiósa plebis ab omni Judæa, et Jerúsalem, et marítima, et Tyri, et Sidónis. Et réliqua.
_
Homilía sancti Ambrósii Epíscopi
!Expos. Evang. Lucæ lib. V, n.60 et 61
Vide órdinem. Opórtet te pauperem fieri spíritu; humílitas enim spíritus divítiæ virtútum sunt. Nisi pauper fúeris, mitis esse non poteris. Qui mitis est, potest lugére præsentia: qui inferióra luget, potest desideráre melióra: qui superióra quærit, inferióra devítat, ut et ipse a superióribus adjuvétur: qui miserétur, cor suum mundat. Quid est enim mundáre ánimum, nisi sordem mortis abolére? Eleemosyna enim a morte líberat. Patiéntia vero perféctio est caritátis. Qui autem pátitur persecutiónem, in último certámine constitútus probátur advérsis, ut, cum legítime certáverit, coronétur.

[Lectio10]
Hos quidam volunt esse gradus virtútum, per quos ab últimis ad superióra possímus ascéndere. Dénique sicut increménta virtútum, ita étiam increménta sunt præmiórum: plus est enim Dei esse fílium, quam possidére terram, et consolatiónem meréri.Sed quia et primum præmium regnum cælórum est, et últimum præmium regnum cælórum est, numquid æquále præmium incipiéntibus atque perféctis est?

[Lectio11]
Habes primum regnum, quando Sancti rapiúntur in núbibus óbviam Christo in áëra. Multi enim dormiéntium surgent, isti in vitam ætérnam, illi in oppróbrium. Primum ergo regnum cælórum Sanctis propósitum est in absolutióne córporis: secúndum regnum cælórum est, post resurrectiónem esse cum Christo.Cum fúeris in regno cælórum, tunc procéssus est mansiónum: etsi unum regnum, divérsa tamen mérita sunt in regno cælórum.

[Lectio12]
Post resurrectiónem terram tuam incípies possidére, absolútus a morte. Ille enim cui dícitur: Terra es, et in terram ibis, non possidet terram suam; non enim potest esse possessor, qui non capit fructum. Absolútus ígitur per Domínicam crucem, si tamen intra jugum Dómini fúeris inventus, consolatiónem in ipsa possessióne repéries. Consolatiónem séquitur delectátio, delectatiónem divína miserátio. Quem autem miserátur Dóminus, et vocat: qui vocátur, videt vocántem: qui Deum víderit, in jus divínæ generatiónis assúmitur: tunc demum quasi Dei fílius, cæléstis regni divítiis delectátur.

[Lectio94]
Sermo sancti Bernárdi Abbatis
!Sermo 5 in Festo omn. Sanct.
Sancti dénique transeuntes ex hoc mundo ad Patrem, sancta nobis pígnora reliquérunt.  Apud nos síquidem córpora eórum in pace sepúlta sunt, quorum nómina vivent in sæculum, id est, quorum numquam glória sepelítur. Absit, absit a vobis, ánimæ sanctæ, Ægyptia illa crudélitas pincérnæ Pharaónis, qui in gradum prístinum restitútus, statim oblítus est Joseph sancti, qui in cárcere tenebátur; non enim erant uníus cápitis membra, nec aliqua pars fidéli cum infidéli, aut ulla societas Israëlítæ ad Ægyptium, non plus quam luci ad ténebras. Interpretátur enim Ægyptus tenebræ, Israël autem Videns Deum: atque ídeo, ubicúmque Israël erat, lux erat. Hæc vero nostra et Sanctorum cohæréntia est, ut nos congratulémur eis, ipsi compatiantur nobis: nos devóta meditatióne regnémus in eis, ipsi in nobis, et pro nobis mílitent pia interventióne.

[Evangelium]
@Sancti/09-27

[Capitulum Laudes]
!Rom 8:11
v. Quod si Spíritus ejus, qui suscitávit Jesum a mórtuis, hábitat in vobis: qui suscitávit Jesum Christum a mórtuis, vivificábit, et mortália córpora vestra, propter inhabitántem Spíritum ejus in vobis.
$Deo gratias

[Hymnus Laudes]
O vos unánimes Christiádum chori,
Sanctórum túmulos et cíneres Patrum,
Caras exúvias, pígnora cǽlitum,
Lætis dícite cántibus.
_
Cælo quando piis æqua labóribus
Felíces ánimæ gáudia póssident,
Pœnárum sóciis débita rédditur
Hic laus et decus óssibus.
_
Passim sparsa, Deus pollíciti memor,
Custos, ne péreant, pígnora cólligit;
Electósque suis próvidus ággerit
Aptándos lápides locis.
_
Quin et Relíquias et túmulos sibi
Aras ipse Deus cónsecrat hóstia;
Conjungén sque suis se caput ártubus,
Hos secum simul ímmolat.
_
Vos quorum cíneres supplícibus pia,
Tutum præsídium, plebs colit ósculis;
Si vos nostra movent, subsídium boni,
Vestris ferte cliéntibus.
_
Ut cum nostra novis spléndida dótibus
Surget juncta choris spirítuum caro,
Indivísa Trias sit Deus ómnia
Nobis semper in ómnibus.
Amen.

[Versum 2]
@Sancti/02-12

[Capitulum Tertia]
!Ph 3:20-21
v. Nostra autem conversátio in cælis est: unde étiam Salvatórem exspectámus Dóminum nostrum Jesum Christum, qui reformábit corpus humilitátis nostræ, configurátum córpori claritátis suæ.
$Deo gratias

[Responsory TertiaM]
@Sancti/07-07:Versum 2

[Capitulum Sexta]
!1 Pe 4:14
v. Si exprobrámini in nómine Christi, beáti éritis: quóniam quod est honóris, glóriæ, et virtútis Dei, et qui est ejus Spíritus, super vos requiéscit.
$Deo gratias

[Responsory SextaM]
@Sancti/07-07:Versum 2

[Capitulum Nona]
!1 Pe 3:13-14
v. Quis est, qui vobis nóceat, si boni æmulatóres fuéritis? * sed et si quid patímini propter justítiam, beáti.
$Deo gratias

[Responsory NonaM]
V. Gloriósus Deus in Sanctis suis.
R. Mirábilis in Majestáte sua.

[Versum 3]
V. Consolábor vos, et gaudébit cor vestrum.
R. Et ossa vestra quasi herba germinábunt.