[Officium]
S. Margaritæ Mariæ Alacoque Virginis

[Rank]
;;Duplex;;3;;vide C6a

[Rule]
vide C6a
9 lectiones

[Oratio]
Dómine Jesu Christe, qui investigábiles divítias Cordis tui beátæ Margarítæ Maríæ Vírgini mirabíliter revelásti; da nobis ejus méritis et imitatióne; ut te in ómnibus et super ómnia diligéntes, jugem in eódem Corde tuo mansiónem habére mereámur:
$Qui vivis.

[Lectio4]
Margarita Maria Alacóque, in pago diœcesis Augustodunénsis, honesto genere nata, jam inde a teneris annis futuræ sanctitátis indícia præbuit. In Deiparam Vírginem et in augustum Eucharistiæ sacraméntum amóre flagrans, adolescentula Deo virginitátem devovit, id exoptans unice ut ad christianas virtútes vitam compóneret. In deliciis habebat prolixas preces rerumque cæléstium contemplatiónem, sui contemptum, patiéntiam in adversis, corporis afflictatiónem, caritátem in próximos, præsertim egénos; summoque studio nitebátur ut sanctíssima divini Redemptoris exempla pro viribus referret.

[Lectio5]
Ordinem Visitatiónis ingressa, statim religiosæ vitæ fulgóre nitére cœpit. Altioris dono oratiónis a Deo est decorata, aliisque gratiæ munéribus et crebris visiónibus. Harum celeberrima fuit cum ante Eucharistiam precanti Jesus semetípsum conspiciéndum obtulit, et divinum Cor in aperto péctore flammis incensum ac spinis constrictum osténdit, præcepitque ut, ob talem caritátem et ad ingratórum hóminum injurias expiandas, illa publicum Cordi suo cultum, magnis propositis cæléstis thesáuri præmiis, instituéndum curaret. Cunctanti ex humilitate seque tantæ rei ímparem profiténti amantíssimus Salvátor addit ánimum, simulque exímia sanctitáte virum, Claudium de la Colombière, ducem et adjutórem designat; eamque spe fovet illíus summæ utilitátis, quæ póstea e divini Cordis cultu in Ecclésiam dimanávit.

[Lectio6]
Ut jussa Redemptoris impleret Margarita omni diligéntia studebat. Nec tamen illi defuére molestiæ plures atque acres contumeliæ ab iis qui eam vano mentis errori obnoxiam esse dictitábant. Quæ ómnia æquo animo tulit, immo apponebat lucro, existimans se per oppróbria et dolóres hóstiam Deo gratam fore, et majora ad propositum suum auxília consecuturam. Religiosæ perfectiónis laude florens et per æternárum rerum contemplatiónem in dies síngulos cælésti sponso conjúnctior, ad eum evolávit, anno ætátis suæ quadragesimo tertio, reparátæ salútis millesimo sexcentésimo nonagesimo. Miraculis insignem Benedíctus décimus quintus Sanctis adscripsit; ejusque offícium Pius undecimus Pontifex maximus ad universam Ecclésiam extendit.

[Lectio94]
Margaríta María Alacóque, in pago diœcésis Augustodunénsis honésto génere nata, jam a téneris annis futúræ sanctitátis indícia prǽbuit. In Deíparam Vírginem et in augústum Eucharístiæ sacraméntum amóre flagrans, adolescéntula Deo virginitátem devóvit; ac órdinem Visitatiónis ingréssa, statim religiósæ vitæ fulgóre nitére cœpit. Altióris dono oratiónis a Deo est decoráta, aliísque grátiæ munéribus et crebris visiónibus. Harum celebérrima fuit cum ante Eucharístiam precánti Jesus semetípsum conspiciéndum óbtulit, et divínum Cor in apérto péctore flammis incénsum ac spinis constríctum osténdit, præcepítque ut, ob talem caritátem et ad ingratórum hóminum injúrias expiándas, illa públicum Cordi suo cultum, magnis propósitis cæléstis thesáuri prǽmiis, instituéndum curáret. Religiósæ perfectiónis laude florens et per æternárum rerum contemplatiónem in dies síngulos cælésti sponso conjúnctior, ad eum evolávit, anno ætátis suæ quadragésimo tértio, reparátæ salútis millésimo sexcentésimo nonagésimo. Miráculis insígnem Benedíctus décimus quintus Sanctis adscrípsit: ejúsque offícium Pius undécimus ad univérsam Ecclésiam exténdit.
&teDeum

[Lectio7]
Léctio sancti Evangélii secúndum Matthǽum
!Matt 11:25-30
In illo témpore, respondens Jesus dixit: Confiteor tibi, Pater, Dómine cæli et terræ, quia abscondísti hæc a sapiéntibus et prudéntibus et revelásti ea párvulis. Et réliqua.
_
Homilía sancti Francísci Salésii Epíscopi
!Sermo 23 in die Pentecostes alter, circa medium
Nulla alia est vera sciéntia, nisi ea quæ a Spíritu Sancto datur, sed hæc humílibus tantummodo tribúitur. Nonne magnos vídimus theólogos qui mira dixérunt de virtútibus, sed ut eas non exercerent? E contra complures vídimus feminas, quæ de virtútibus dissérere nesciébant, sed virtútum ópera digne nóverant adimplére. Eas enim Spíritus Sanctus sapiéntes effécit, quia et timórem Dómini et pietátem et humilitátem habebant.

[Lectio8]
!Fragmentum sermo 16, in III Dominica post Pentecostem, initio
Dóminus noster, magnus et præclaríssimus ómnium nostrárum infirmitátum medicus, antequam in hunc mundum veníret, per prophétas suos palam nuntiáverat: Quod confractum fúerit alligábo, et quod infirmum fúerit consolidábo. Et deínde suo ipse ore clamávit dicens: Veníte ad me omnes qui laborátis et oneráti estis, et ego reficiam vos. Quid ígitur mirum si ipsum ab ægrotis, a peccatóribus et publicanis circúmdatum cernimus? Nonne médici glória est ab ægrotis exquiri?

[Lectio9]
!Fragmentum serm. 10 pro Feria II post Pascha, in fine
Fert ille nostras misérias et jas nobilitat, apponit misériam Cordi suo, osténdit latus. Sed eum redamémus oportet, alioquin qui præ amóre osténdit vulnera, semel osténdet præ ira et indignatióne. Fac, o bone Jesu, ut pacem, quam offers, accipiámus, videamúsque vulnera tua, ut quandóquidem manent fides, spes, caritas, fide radicati, spe gaudéntes et caritate fervéntes, exspectémus beátam spem et advéntum tuum, ita ut in illo Te, Agnum ad déxteram non leónem ad sinistram videámus; ac pro fide visiónem, pro spe possessiónem et pro caritate imperfécta perféctam habeámus, in qua gaudébimus in sæcula sæculórum. Amen.