[Officium]
Ss. Isaaci Jogues, Joannis de Brébeuf et Sociorum Martyrum

[Rank]
;;Duplex;;3;;vide C3

[Rule]
vide C3;
Quorum Festum

[Oratio]
Deus, qui primítias fídei in boreálibus Américæ regiónibus sanctórum Mártyrum tuórum Isaáci, Joánnis, eorúmque Sociórum prædicatióne et sánguine consecrásti: concéde propítius; ut, eórum intercessióne, flórida christianórum seges ubíque in dies augeátur. 
$Per Dominum

[Lectio4]
Ex iis Societatis Jesu sodalibus, qui Ecclesiæ in America boreali exordia medio sæculo septimo maxime illustrarunt, octo purissimas hostias sibi elegit Deus, ut fidei semina earum sanguine irrigata in uberiores segetes deínde succrescerent. Omnes hi Martyres, in Gallia nati et, præter duos laicos, sacerdotio aucti, in Missionem Canadensem, quæ Novæ Galliæ tunc vocabatur, a Superioribus missi, post innumeros ex urbe Quebecensi per varias illas immensas regiones apostolicos excursus, asperrimosque labores ob unam eamdemque religionis causam, etsi non uno eodemque tempore nec loco, crudelissime necati sunt. Horum veluti duces ac magistri merito censentur Joannes de Brebeuf, Condæi in diocesi olim Baiocensi nunc Constantiensi nobili genere ortus, et Isaacus Jogues, aurelianensis, viri strenuo et apostolico zelo incensi, mortificationi maxime dediti, cum Deo in oratione conjunctissimi, cælestibus étiam visionibus quandoque illustrati. Ab iis haud absimiles erant quatuor socii sacerdotes Antonius Daniel, dieppensis, Gabriel Lalemant et Carolus Garnier, parisienses, Natalis Chabanel, mimatensis; qui omnes variis in pagis potissimum inter Hurones sacris muneribus fideliter fungebantur.

[Responsory4]
R. Sancti tui, Domine, mirabile consecuti sunt iter, servientes præceptis tuis, ut invirentur illæsi in aquis validis:
* Terra apparuit arida, et in Mari Rubro via sine impedimento.
V. Quoniam percussit petram et fluxerunt aquæ et torrentes inundaverunt.
R. Terra apparuit arida, et in Mari Rubro via sine impedimento.

[Lectio5]
Frequentes finitimorum Iroquensium incursiones, Huronicam missionem sæpe vastantes, haud raro in supremum discrimen Patrum vitam vocabant. Anno millesimo sexcentesimo quadragesimo secundo, Isaacus Jogues, cum Renato Goupil, Societatis Jesu coadjutore temporali, ex urbe Quebecensi ad Hurones iter faciens, in Iroquenses incidit, qui eum ejusque socium dirissime torquent et in servitutem redigunt. Eodem anno die vigesima nona Septembris, Renatus, in odium salutiferæ crucis a barbaro sene interfici jussus, prope Auriesville, in hodierno Neo-Eboracensi Statu, candidissimam animam efflavit. Isaacus anno proximo, aufugiendi occasionem nactus, in Galliam revertit; sed post annum Americam repetens et semel atque iterum ad eosdem barbaros, suos olim carnifices, cum Joanne de la Lande, Societatis Jesu item coadjutore, progressus, die decima octava Octobris anno millesimo sexcentesimo quadragesimo sexto, in hodierna diocesi Albanensi, acinace percussus martyrii palmam consecutus est. Postero vero die ejus socius Joannes, eadem redimitus corona, ad cælum evolavit.

[Responsory5]
R. Verbera carnificum non timuerunt Sancti Dei, morientes pro Christi nomine:
* Ut heredes fierent in domo Domini.
V. Tradiderunt corpora sua propter Deum ad supplicia.
R. Ut heredes fierent in domo Domini.

[Lectio6]
Anno millesimo sexcentesimo quadragesimo octavo, die quarta Julii Antonius Daniel, qui pagi Sancti Joseph inter Hurones curam gerebat, contra invasores Iroquenses gregem suum impavidus defendens, sagittis et ignitis glandibus confossus, ad templi fores bonus pastor pro ovibus animam posuit. Anno proximo, die decima sexta Martii, Joannes de Brebeuf, Huronum apostolus merito nuncupatus, una cum Gabriele Lalemant, ab Iroquensibus comprehensus, post diuturnos sævissimosque cruciatus, ipsis barbaris invictam Christi pugilis fortitudinem demirantibus, in pago Sancti Ignatii in hodierna Canadensi regione Ontario nuncupata, gloriosus occubuit; quem postridie Gabriel Lalemant eadem cruenta via eademque virtute secutus est. Mense autem Decembri ejusdem anni millesimi sexcentesimi quadragesimi noni, in pervigilio Immaculatæ Conceptionis beatæ Mariæ Virginis, Carolus Garnier, vulneribus confossus et securi percussus, innocentissimam vitam glorioso exitu conclusit. Postero demum die, Natalis Chabanel, ab Hurone apostata dolose invasus et in profluentem dejectus, in dilecta sibi Missione, cui perpetuo colendæ, natura frustra obsistente, heroico voto se obstrinxerat, optatam martyrii palmam adeptus est. Hos octo Americæ borealis primores Martyres Pius Undecimus Pontifex Maximus, anno sacro millesimo nongentesimo vigesimo quinto, Beatorum numero, eosque quinque post annis Sanctorum fastis ascripsit.

[Responsory6]
R. Tamquam aurum in fornace probavit electos Dominus, et quasi holocausti hostiam accepit illos; et in tempore erit respectus illorum:
* Quoniam donum et pax est electis Dei.
V. Qui confidunt in illum, intellegent veritatem: et fideles in dilectione acquiescent illi.
R. Quoniam donum et pax est electis Dei.
&Gloria
R. Quoniam donum et pax est electis Dei.

[Lectio94]
Ex iis Societátis Jesu sodálibus, qui médio sǽculo décimo séptimo aspérrimam missiónem Novæ Gálliæ excoléntes, Ecclésiæ  primórdia in América Septentrionáli summópere illustrárunt, octo puríssimas hóstias sibi elégit Deus, in hodiérnis regiónibus Neo-Eboracénsi et Ontário in Cánada immolátas. In his véluti duces et magístri habéntur Joánnes de Brébeuf et Isaácus Jogues, viri strénui et apostólico animárum stúdio incénsi, mortificatióni máxime déditi, cum Deo in oratióne coniunctíssimi. Haud dispáribus virtútibus ornabántur sacerdótes Antónius Daniel, Gábriel Lalemant, Cárolus Garnier et Natális Chabanel, necnon Renátus Goupil et Joánnis de la Lande, Patrum adjutóres.  Vitam ob indigenárum Eurónum índolem miserrimámque vivéndi ratiónem, martýrio símilem, omnes cruénta more propter unam religiónis causam, etsi non uno loco nec témpore, cumulárunt; quidam vero torménta vix credibília ádeo invícta fortitúdine pertulérunt, ut ipsi bárbari carnífices eos admiraréntur. Quos Pius undécimus Beatórum, ac mox miráculis claros Sanctórum número adscrípsit.
&teDeum

[Lectio7]
Léctio sancti Evangélii secúndum Lucam
!Luc 6:17-23
In illo témpore: Descendens Jesus de monte, stetit in loco campestri, et turba discipulorum ejus, et multitudo copiosa plebis ab omni Judǽa, et Jerúsalem, et maritima, et Tyri, et Sidonis. Et réliqua.
_
Homilia sancti Petri Canisii Presbýteri
!Notæ in evangelicas lectiones: in die festo Omnium Sanctorum, post initium
Notabo Christum longe aliter quam hunc mundum, de beatitudine docere atque pronuntiare. Mundi etenim est proprium rebus caducis et fluxis, quæ hic relinquendæ sunt, mentiri hominis felicitatem, perinde ac si dicatur: Beatus populus, cui hæc sunt. Immo vero quos Christus beatos hic pronuntiat, eos insipiens mundus tantum pro miseris et infelicibus ducit, eosdem de more contemnit atque aversatur, ut hinc étiam Christus ipse testetur Apostolis: Amen, amen dico vobis, quia plorabitis et flebitis vos; mundus autem gaudebit, vos autem contristabimini. Recteque dixit Salomon: Ambulans recto itinere et timens Deum, despicitur ab eo qui infami graditur via.

[Responsory7]
R. Propter testamentum Domini et leges paternas, Sancti Dei perstiterunt in amóre fraternitatis:
* Quia unus fuit semper spiritus in eis, et una fides.
V. Ecce quam bonum et quam jucundum habitare fratres in unum!
R. Quia unus fuit semper spiritus in eis, et una fides.

[Lectio8]
Beati demum sunt qui persecutionem propter justitiam patiuntur, suaque invicta patientia Christi regnum æternum obtinent. Ad hoc genus beatitudinis, nulli magis quam protomartyr Stephanus aliique fortissimi Christi milites ac martyres referendi sunt: quoniam velut oves ad occisionem pertractæ, ad sanguinem usque pro justitia christiana certarunt, nulla ut hostium vis atque barbaries, nulla tribulationis vel tentationis acerbitas eos a fidei confessione, Christi caritate, doctrina Ecclesiæ et justitiæ tramite potuerit abducere ac separare. O felices illi qui bona testari conscientia potuerunt: Quis nos separabit a caritate Christi? Tribulatio? an angustia? an fames? an nuditas? an periculum? an persecutio? an gladius? In his omnibus superamus propter eum qui dilexit nos. Transivimus per ignem et aquam, et eduxisti nos in refrigerium.

[Responsory8]
R. Sancti mei, qui in carne positi certamen habuistis:
* Mercedem laboris ego reddam vobis.
V. Venite, benedicti Patris mei, percipite regnum.
R. Mercedem laboris ego reddam vobis.
&Gloria
R. Mercedem laboris ego reddam vobis.

[Lectio9]
Præterea felices omnes qui hanc scalam Jacob, superioribus gradibus octo distinctam, in hunc usque diem ascendunt, relictis omnibus impedimentis, ita ut capitales hostes, mundum, carnem ac satanam, cotidie vincant sibique virtutum studio gradum faciant ad beatam immortalitatem. Verum longe feliciores et illi, qui pugnandi et vincendi fecere finem et, ipso ascendendi labore confecto, ad certaminis coronam pervenerunt jamque, veluti rude donati et emeriti milites, quiete summa potiuntur, et in cælesti tabernaculo habitant, mercede amplissima cumulati. Nec dubium quin sancti Martyres piique Doctores præ ceteris florescant electis in perpetuas æternitates, quoniam ob virtutes heroicas aureolam, sicut Theologi vocant, et excellentem lauream peculiari privilegio consequentur.
&teDeum