[Officium]
S. Joannis Eudes Confessoris

[Rank]
;;Duplex;;3;;vide C5

[Rule]
vide C5;
9 lectiones

[Oratio]
Deus, qui beátum Joánnem, Confessórem tuum, ad cultum sacrórum Córdium Jesu et Maríæ rite promovéndum, mirabíliter inflammásti, et per eum novas in Ecclésia tua famílias congregáre voluísti: præsta, quǽsumus; ut, cujus pia mérita venerámur, virtútum quoque instruámur exémplis.
$Per eumdem

[Lectio4]
Joannes, anno millesimo sexcentesimo primo, in pago vulgo Ri, Sagiensis diœcesis, e piis honestisque parentibus ortus est. Adhuc puer, Angelorum pane refectus, perpetuam castitatem alacriter vovit. In Cadomense collegium a patribus Societatis Jesu directum exceptus, singulari pietate emicuit; et Mariæ Virginis tutelæ sese committens, speciale fœdus initum cum ea vix adolescens suo sanguine signavit. Litterarum ac philosophiæ curriculo multa cum laude peracto, spretisque sibi oblatis nuptiis, Berulliani Oratorii congregationi nomen dedit, et sacerdotio Parisiis auctus est. Mira caritate erga proximum flagravit: nam apud plura loca, corporibus, asiatica lue perculsis, animisque curandis sedulam operam dedit. Domus Oratorianæ Cadomi rector factus, quum diu cogitaret ad Ecclesiæ ministerium juvenes idoneos instituere, a sodalibus, quibuscum viginti annos vixerat, divina ope implorata, licet ægre, forti animo discessit.

[Lectio5]
Quinque igitur sacerdotes sibi consocians, anno millesimo sexcentesimo quadragesimo tertio, die festo Annuntiationis beatæ Mariæ Virginis, congregationem presbyterorum instituit, cui sanctissima Jesu et Mariæ nomina dedit, et Cadomi primum seminarium aperuit, quod in Normannia et Britannia minori complura, eodem auctore, subsecuta sunt. Pro peccatricibus feminis, ad christianam vitam revocandis, ordinem Dominæ nostræ a Caritate fundavit; cujus nobilissimæ arboris ramus est congregatio Andegavensis a Bono Pastore. Insuper societatem a Matris Dei Corde admirabili, et alia caritatis opera condidit. Scripta plura præclare edidit, et missionarius Apostolicus tot pagos, oppida et urbes ipsamque regiam aulam usque ad extremam ætatem, evangelizavit.

[Lectio6]
Singulare ejus studium emicuit in salutari devotione promovenda erga sacratissima Corda Jesu et Mariæ, quorum liturgicum cultum eisdem præstandum non sine aliquo divino afflatu, primus omnium excogitavit ideoque ejusdem cultus pater, doctor et apostolus habitus est. Jansenistarum doctrinis fortiter resistens, immutatum erga Petri cathedram obsequium servavit, et pro suis inimicis, tamquam pro fratribus, assidue Deum precatus est. Tot laboribus, potius quam annis fractus, cupiens dissolvi et esse cum Christo, die decima nona Augusti, anno millesimo sexcentesimo octogesimo, suavia Jesu et Mariæ nomina sæpius repetens, placide exspiravit. Quem pluribus miraculis clarum Pius Papa decimus Beatorum albo adscripsit eumque novis signis fulgentem Pius Papa undecimus, anno sacro, in die dominica Pentecostes inter Sanctos retulit ejusque Officium ac Missam ad universam Ecclesiam exendit.

[Lectio94]
Joánnes, anno millésimo sexcentésimo primo, in pago vulgo Ri, Sagiénsis diœcésis, ex piis honestísque paréntibus ortus est. Adhuc puer, jam Angelórum pane reféctus, perpétuam castitátem vovit. In scholis, ubi laudabíliter stúdia perégit, mira pietáte enítuit. Beátam Vírginem summópere diléxit, et exímia erga próximum caritáte exársit. Berulliáni Oratórii Congregatióni nomen dedit et sacerdótio Parísiis auctus est. Domus Oratoriánæ Cadómi Rector factus, ab eádem, licet ægre, discéssit, ut ad Ecclésiæ ministérium júvenes idóneos institúeret. Quare quinque sibi adscítis sóciis, Congregatiónem Presbyterórum fundávit, cui Sanctíssima Jesu et Maríæ nómina dedit, et Cadómi primum Seminárium apéruit, quod póstea plura subsecúta sunt. Ut peccatríces mulíeres ad vitam christiánam revocáret, Dóminæ Nostræ a Caritáte Institútum fundávit: cujus nobilíssimæ árboris ramus est Congregátio Andegavénsis a Bono Pastóre Societátem ab admirábili Corde Matris Dei, et ália caritátis ópera adjécit. Singulári erga Sanctíssima Jesu et Maríæ Corda flagrans amóre, de litúrgico eis cultu præstándo non sine áliquo divíno afflátu primus cogitávit. Missionárius Apostólicus plúrimos pagos et urbes evangelizávit. Tot labóribus fractus, morti próximus, die décima nona augústi anno millésimo sexcentésimo octogésimo plácide expirávit. Quem Pius Papa décimus miráculis clarum, inter Beátos, Pius vero undécimus, anno sacro, die Pentecóstes, inter Sanctos rétulit, ejúsque Offícium ac Missam ad univérsam Ecclésiam exténdit.
&teDeum