[Officium]
S. Patricii Episcopi et Confessoris

[Rank]
;;Duplex;;3;;vide C4

[Rule]
vide C4;
9 lectiones;

[Name]
Patrícium

[Oratio]
Deus, qui ad prædicándam géntibus glóriam tuam beátum Patrícium Confessórem atque Pontíficem míttere dignátus es: ejus méritis et intercessióne concéde; ut, quæ nobis agénda prǽcipis, te miseránte adimplére possímus.
$Per Dominum

[Lectio4]
Patricius, Hiberniæ dictus Apostolus, Calphurnio patre, matre Conchessa sancti Martini Turonensis episcopi, ut perhibent, consanguinea, majori in Britannia natus, puer in barbarorum sæpius incidit captivitatem. Eo in statu, pascendis gregibus præpositus jam tum futuræ sanctitatis specimen præbuit: fidei namque, divinique timoris et amoris spiritu repletus, antelucano tempore per nives, gelu ac pluvias ad preces Deo fundendas, impiger consurgebat; solitus centies interdiu, centiesque noctu Deum orare. A servitute tertio exemptus, et inter clericos relatus, in divinis lectionibus longo se tempore exercuit. Galliis, Italia, insulisque Tyrrheni maris labore summo peragratis, divino tandem monitu ad Hibernorum salutem advocatur; et facta a beato Cælestino Papa Evangelii nuntiandi potestate, consecratusque episcopus, in Hiberniam perrexit.

[Lectio5]
Eo in munere mirum quot vir apostolicus mala, quot ærumnas et labores, quot pertulerit adversarios. Verum Dei afflante benignitate, terra illa, idolorum antea cultrix, eum mox prædicante Patricio fructum dedit, ut sanctorum insula deínde fuerit appellata. Frequentissimi ab eo populi sacro sunt regenerati lavacro: episcopi, clericique plurimi ordinati;
virgines ac viduæ ad continentiæ leges institutæ. Armachanam sedem, Romani Pontificis auctoritate, totius insulæ principem metropolim constituit, sanctorumque reliquiis ab Urbe relatis decoravit. Supernis visionibus, prophetiæ dono, ingentibusque signis et prodigiis a Deo exornatus adeo refulsit, ut longe lateque celebrior Patricii se fama diffuderit.

[Lectio6]
Præter quotidianam ecclesiarum sollicitudinem, invictum ab oratione spiritum numquam relaxabat. Ajunt enim, integrum quotidie Psalterium, una cum Canticis et Hymnis, ducentisque orationibus, consuevisse recitare, tercenties per dies singulos flexis genibus Deum adorare, ac in qualibet hora diei canonica centies se crucis signo munire. Noctem tria in spatia distribuens, primum in centum Psalmis percurrendis et bis centies genuflectendo alterum in reliquis quinquaginta Psalmis, algidis aquis immersus, ac corde, oculis manibusque ad cælum erectus, absolvendis insumebat: tertium vero super nudum lapidem stratus tenui dabat quieti. Humilitatis eximius cultor, apostolico more a manuum suarum labore non abstinuit. Assiduis tandem curis pro Ecclesia consumptus, verbo et opere clarus, in extrema senectute divinis mysteriis refectus, obdormivit in Domino, sepultusque est apud Dunum in Ultonia, a christiana salute sæculo quinto.