02-27# Ex Régula Sancti Patri Nostri Benedícti. Caput 21: De decánis monastérii 
_
Si major fúerit congregátio, elegántur de ipsis fratres boni testimónii et sanctæ conversatiónis, et constituántur decáni, qui sollicitúdinem gerant super decánias suas in ómnibus secúndum mandáta Dei et præcépta abbátis sui. Qui decáni tales elegántur in quibus secúrus abbas pártiat ónera sua. Et non elegántur per órdinem, sed secúndum vitæ méritum et sapiéntiæ doctrínam. Quique decáni, si ex eis áliqua forte qui inflátus supérbia repértus fúerit reprehensíbilis, corréptus semel et íterum atque tértio si emendáre nolúerit, deiciátur, et alter in loco ejus qui dignus est subrogétur. Et de præpósito éadem constitúimus.