02-19# Ex Régula Sancti Patri Nostri Benedícti. Caput 16: Quáliter divína ópera per diem agántur 
_
Ut ait Prophéta: Sépties in die laudem dixi tibi. Qui septenárius sacrátus númerus a nobis sic implébitur, si Matutíno, Primæ, Tértiæ, Sextæ, Nonæ, Vésperæ Conpletoriíque témpore nostræ servitútis offícia persolvámus, quia de his diúrnis Horis dixit: Sépties in die laudem dixi tibi. Nam de noctúrnis Vigíliis idem ipse Prophéta ait: Média nocte surgébam ad confiténdum tibi. Ergo his tempóribus referámus laudes Creatóri nostro super judícia justítiæ suæ, id est Matutínis, Prima, Tértia, Sexta, Nona, Véspera, Conpletórios, et nocte surgámus ad confiténdum ei.