Quarto Kaléndas Januárii
_
Cantuáriæ, in Anglia, natális sancti Thomæ, Epíscopi et Mártyris, qui, ob defensiónem justítiæ et ecclesiásticæ immunitátis, in Basílica sua, ab impiórum hóminum factióne percússus gládio, Martyr migrávit ad Christum.
Hierosólymis sancti David, Regis et Prophétæ.
Areláte, in Gállia, natális sancti Tróphimi, cujus méminit sanctus Paulus ad Timótheum scribens. Ipse autem Tróphimus, ab eódem Apóstolo Epíscopus ordinátus, præfátæ urbi primus ad Christi Evangélium prædicándum diréctus est; ex cujus prædicatiónis fonte (ut sanctus Zósimus Papa scribit) tota Gállia rívulos fídei recépit.
Romæ sanctórum Mártyrum Callísti, Felícis et Bonifátii.
In Africa pássio sanctórum Mártyrum Domínici, Victóris, Primiáni, Lybósi, Saturníni, Crescéntii, Secúndi et Honoráti.
Constantinópoli sancti Marcélli Abbátis.
In pago Oxyménsi, in Gállia, sancti Ebrúlphi, Abbátis et Confessóris, témpore Childebérti Regis.
Viénnæ, in Gállia, Commemorátio sancti Crescéntis, Epíscopi et Mártyris, qui fuit discípulus beáti Pauli Apóstoli ac primus ejúsdem civitátis Epíscopus, et cujus dies natális quinto Kaléndas Júlii celebrátur.