Sextodécimo Kaléndas Januárii
_
Romæ natális sancti Joánnis de Matha, Presbýteri et Confessóris, qui Ordinis sanctíssimæ Trinitátis redemptiónis captivórum Fundátor éxstitit. Ipsíus tamen festívitas, ex dispositióne Innocéntii Papæ Undécimi, ágitur sexto Idus Februárii.
Massíliæ, in Gállia, beáti Lázari Epíscopi, sanctárum Maríæ Magdalénæ ac Marthæ fratris, quem Dóminus in Evangélio appellásse amícum et a mórtuis excitásse légitur.
Eleutherópoli, in Palæstína, sanctórum Mártyrum Floriáni, Calaníci, et Sociórum quinquagínta et octo; qui, témpore Heráclii Imperatóris, a Saracénis ob Christi fidem occísi sunt.
In monastério Fuldénsi sancti Stúrmii, Abbátis et Saxóniæ Apóstoli; quem Innocéntius Papa Secúndus, in Concílio secúndo Lateranénsi, in Sanctórum númerum rétulit.
Bigárdis, prope Bruxéllas, in Brabántia, sanctæ Wivínæ Vírginis, cujus egrégiam sanctitátem mirácula crebra testántur.
Constantinópoli sanctæ Olympíadis Víduæ.
Andániæ, apud Septem Ecclésias, in Bélgio, beátæ Beggæ Víduæ, quæ fuit soror sanctæ Gertrúdis.
Eódem die Translátio sancti Ignátii, Epíscopi et Mártyris; qui, tértius post beátum Petrum Apóstolum, Antiochénam rexit Ecclésiam. Ejus corpus ab urbe Roma, ubi ipse, sub Trajáno, glorióse martýrium tertiodécimo Kaléndas Januárii consummáverat, Antiochíam delátum, ibídem, in cœmetério Ecclésiæ, extra portam Daphníticam, pósitum fuit; in qua celebritáte sanctus Joánnes Chrysóstomus conciónem ad pópulum hábuit. Póstmodum vero ejus relíquiæ rursus Romam translátæ sunt, et in Ecclésia sancti Cleméntis, una cum córpore ejúsdem beatíssimi Papæ et Mártyris, summa veneratióne recónditæ.