Prídie Nonas Novémbris
_
Sancti Cároli Borromǽi Cardinális, Epíscopi Mediolanénsis et Confessóris, qui migrávit in cælum prídie hujus diéi.
Bonóniæ sanctórum Mártyrum Vitális et Agrícolæ; quorum prior posterióris servus ántea fuit, póstea consors et colléga martýrii. In ipsum porro Vitálem persecutóres ómnia tormentórum génera ita exercuérunt, ut non esset in córpore ejus sine vúlnere locus, quæ ipse constánter pérferens, in oratióne spíritum Deo réddidit; Agrícolam vero, plúrimis clavis cruci affigéntes, interemérunt. Eórum translatióni sanctus Ambrósius cum interésset, Mártyris clavos, sánguinem triumphálem et crucis lignum se collegísse refert, ac sub sacris altáribus condidísse.
In cœnóbio Cervi Frígidi, territórii Meldénsis, natális sancti Felícis Valésii, Presbýteri et Confessóris; qui Fundátor fuit Ordinis sanctíssimæ Trinitátis redemptiónis captivórum. Ipsíus autem festum, ex dispositióne Innocéntii Papæ Undécimi, celebrátur duodécimo Kaléndas Decémbris.
Eódem die natális quoque sanctórum Philólogi et Pátrobæ, sancti Pauli Apóstoli discipulórum.
Augustodúni sancti Próculi, Epíscopi et Mártyris.
Myræ, in Lýcia, sanctórum Mártyrum Nicándri Epíscopi, et Hermæ Presbýteri, sub Libánio Prǽside.
In pago Vilcassíno, in Gállia, sancti Clari, Presbýteri et Mártyris.
Ephesi sancti Porphýrii Mártyris, sub Aureliáno Imperatóre.
Apud Ruthénos, in Gállia, beáti Amántii Epíscopi, cujus vita éxstitit sanctitáte et miráculis gloriósa.
Romæ natális sancti Piérii, Presbýteri Alexandríni, qui, in divínis Scriptúris nobíliter erudítus, vita puríssimus, et ad Christiánam philosophíam nudus pénitus et expedítus, sub Caro et Diocletiáno Princípibus, regénte Alexandrínam Ecclésiam Theóna, florentíssime dócuit pópulum, et divérsos tractátus édidit; post persecutiónem vero, omne vitæ suæ tempus Romæ versátus, in pace quiévit.
In Bithýnia sancti Joannícii Abbátis.
Apud Albam Regálem, in Pannónia, deposítio beáti Emeríci Confessóris, qui fuit fílius sancti Stéphani, Hungarórum Regis.
Tréviris sanctæ Modéstæ Vírginis.