Undécimo Kaléndas Octóbris
_
In Æthiópia natális sancti Matthǽi, Apóstoli et Evangelístæ; qui, in ea regióne prǽdicans, martýrium passus est. Hujus Evangélium, Hebrǽo sermóne conscríptum, ipso Matthǽo revelánte, invéntum est, una cum córpore beáti Bárnabæ Apóstoli, témpore Zenónis Imperatóris.
In terra Saar sancti Jonæ Prophétæ, qui sepúltus est in Geth. 
In Æthiópia sanctæ Iphigéniæ Vírginis, quæ, baptizáta a beáto Matthǽo Apóstolo et Deo dicáta, sancto fine quiévit.
Romæ sancti Pámphili Mártyris.
Eódem die, via Cláudia, vigésimo ab Urbe milliário, pássio sancti Alexándri Epíscopi, qui, sub Antoníno Imperatóre, pro Christi fide, víncula, fustes, equúleum, lámpades ardéntes, ungulárum laniatiónem, béstias ac fornácis superávit flammas, ac tandem, gládio cæsus, vitam adéptus est gloriósam. Ejus corpus póstea beátus Dámasus Papa in Urbem tránstulit sexto Kaléndas Decémbris.
In Cypro sancti Isácii, Epíscopi et Mártyris.
In Phœnícia sancti Eusébii Mártyris, qui, cum ultro Præféctum adísset et se Christiánum esse denuntiásset, ab eo, multis torméntis afflíctus, cápite cæsus est.
In Cypro sancti Melétii, Epíscopi et Confessóris.