Prídie Nonas Septémbris
_
In monte Nebo, terræ Moab, sancti Móysis, legislatoris et Prophétæ.
Neápoli, in Campánia, natális sanctæ Cándidæ, quæ sancto Petro Apóstolo, ad eam urbem veniénti, prima occúrrit, atque, ab eo baptizáta, póstea sancto fine quiévit.
Tréviris sancti Marcélli, Epíscopi et Mártyris.
Ancýræ, in Galátia, natális sanctórum trium puerórum Mártyrum, id est Rufíni, Silváni et Vitálici.
Eódem die sanctórum Mártyrum Magni, Casti et Máximi.
Cabillóne, in Gálliis, sancti Marcélli Mártyris, qui, sub Antoníno Imperatóre, cum a Prǽside Prisco ad profanum convívium fuísset invitátus, et, hujúsmodi épulas éxsecrans, omnes qui áderant, cur idólis deservírent, líbera increpatióne corríperet, ab eódem Prǽside, inaudíto crudelitátis génere, cíngulo tenus defóssus est in terra; sicque, cum in Dei láudibus tríduo perseverásset, incontaminátum spíritum réddidit.
Eódem die sanctórum Thamélis, ántea idolórum sacerdótis, et Sociórum Mártyrum, sub Hadriáno Imperatóre.
Item sanctórum Mártyrum Theodóri, Oceáni, Ammiáni et Juliáni; qui sub Maximiáno Imperatóre, disséctis pédibus in ignem conjécti, martýrium consummárunt.
Romæ sancti Bonifátii Primi, Papæ et Confessóris.
Arímini sancti Maríni Diáconi.
Panórmi natális sanctæ Rosáliæ, Vírginis Panormitánæ, ex régio Cároli Magni sánguine ortæ; quæ, pro Christi amóre, patérnum principátum aulámque profúgit, et, in móntibus ac spelúncis solitária, cæléstem vitam duxit.
Vitérbii Translátio beátæ Rosæ Vírginis, ex tértio Ordine sancti Francísci, témpore Alexándri Papæ Quarti.