Quarto Kaléndas Septémbris
_
Decollátio sancti Joánnis Baptístæ, quem Heródes circa festum Paschæ decollári præcépit. Ipsíus tamen memória solémniter hac die cólitur, qua venerándum ejus caput secúndo invéntum fuit; quod, póstea Romam translátum, in Ecclésia sancti Silvéstri, ad Campum Mártium, summa pópuli devotióne asservátur.
Romæ, in monte Aventíno, natális sanctæ Sabínæ Mártyris, quæ sub Hadriáno Imperatóre, gládio percússa, martýrii palmam adépta est.
Veliniáni, in confínibus Apúliæ, pássio sanctórum Vitális, Satóris et Repósiti; qui, sanctórum Bonifátii et Theclæ fílii, a Valeriáno Júdice, sub Maximiáno Imperatóre, capitálem senténtiam pertulérunt. Eórum tamen ac ceterórum ex duódecim frátribus memória Kaléndis Septémbris recólitur.
Romæ sanctæ Cándidæ, Vírginis et Mártyris; cujus corpus beátus Paschális Primus Papa in Ecclésiam sanctæ Praxédis tránstulit.
Constantinópoli sanctórum Mártyrum Hypátii, Asiáni Epíscopi, et Andréæ Presbýteri; qui ambo, ob cultum sanctárum Imáginum, sub Leóne Isáurico, barba pice íllita atque incénsa, et cute cápitis extrácta, juguláti sunt.
Antiochíæ natális sanctórum Mártyrum Nicǽæ et Pauli.
Metis, in Gállia, sancti Adélphi, Epíscopi et Confessóris.
Lutétiæ Parisiórum deposítio sancti Mederíci Presbýteri.
Perúsiæ sancti Euthýmii Románi, qui, cum uxóre et Crescéntio fílio persecutiónem Diocletiáni fúgiens, ad eam urbem secéssit, et ibi póstmodum quiévit in Dómino.
In Anglia sancti Sebbi Regis.
Apud Sírmium natális sanctæ Basíllæ Vírginis.
In pago Tricassíno sanctæ Sabínæ Vírginis, virtútibus et miráculis gloriósæ.