Décimo Kaléndas Septémbris
_
Sancti Philíppi Benítii Confessóris, qui Ordinis Servórum beátæ Maríæ Vírginis éxstitit propagátor, ac prídie hujus diéi migrávit ad Dóminum.
Apud Ostia Tiberína sanctórum Mártyrum Quiríaci Epíscopi, Máximi Presbýteri, Archelái Diáconi, et Sociórum, qui sub Ulpiáno Præfécto, témpore Alexándri, passi sunt.
Antiochíæ natális sanctórum Mártyrum Restitúti, Donáti, Valeriáni et Fructuósæ, cum áliis duódecim; qui præclaríssimo confessiónis honóre coronáti sunt.
Ægǽæ, in Cilícia, sanctórum Mártyrum fratrum Cláudii, Astérii et Neónis, qui, Christiánæ religiónis a novérca accusáti, sub Diocletiáno Imperatóre et Lýsia Prǽside, post acérba torménta cruci sunt affíxi, in qua victóres cum Christo triumphárunt. Passæ sunt post eos Donvína et Theonílla.
Rhemis, in Gállia, natális sanctórum Timóthei et Apollináris, qui, ibídem consummáto martýrio, cæléstia regna meruérunt.
Lugdúni, in Gállia, sanctórum Mártyrum Minérvi, et Eleazári cum fíliis octo.
Item sancti Luppi Mártyris, qui, ex servíli conditióne, Christi libertáte donátus, martýrii quoque coróna dignátus est.
Hierosólymis sancti Zachǽi Epíscopi, qui, quartus a beáto Jacóbo Apóstolo, Hierosolymitánam Ecclésiam rexit.
Alexandríæ sancti Theónæ, Epíscopi et Confessóris.
Uticæ, in Africa, beáti Victóris Epíscopi.
Augustodúni sancti Flaviáni Epíscopi.