Quinto Kaléndas Augústi
_
Medioláni natális sanctórum Mártyrum Nazárii, et Celsi púeri, quos Anolínus, sub rábie persecutiónis quæ per Nerónem excitáta est, diu macerátos et afflíctos in cárcere, gládio feríri jussit. 
Romæ pássio sancti Victóris Primi, Papæ et Mártyris. Item Romæ sancti Innocéntii Primi, Papæ et Confessóris, qui ad Dóminum migrávit quarto Idus Mártii.
Thebáide, in Ægýpto, commemorátio plurimórum sanctórum Mártyrum, qui in Décii et Valeriáni persecutióne passi sunt, quando Christiánis, optántibus pro Christi nómine gládio pércuti, cállidus hostis, tarda ad mortem supplícia conquírens, ánimas cupiébat juguláre, non córpora. Ex eórum número unus, post equúleos et láminas ac sartágines superátas, melle perúnctus, ligátis mánibus post tergum, sub ardentíssimo sole, fucórum ac muscárum acúleis expósitus fuit; álius, inter flores mólliter vinctus, cum ad eum, ut concitáret in libídinem, impudicíssimum scortum venísset, præcísam morsu linguam in blandiéntis fáciem éxspuit.
Ancýræ, in Galátia, sancti Eustáthii Mártyris, qui, váriis tormentórum genéribus excruciátus, atque demérsus in flumen, sed inde ab Angelo eréptus, demum, colúmba e cælis adveniénte, ad prǽmia ætérna vocátus est.
Miléti, in Cária, sancti Acátii Mártyris, qui, sub Licínio Imperatóre, post divérsas pœnas, injéctus in fornácem ac Dei ope servátus illǽsus, cápitis abscissióne martýrium complévit.
In Británnia minóre sancti Sampsónis, Epíscopi et Confessóris. 
Lugdúni, in Gállia, sancti Peregríni Presbýteri, cujus beatitúdinem glória miraculórum testátur.