Décimo séptimo Kaléndas Augústi
_
Commemorátio beátæ Maríæ Vírginis de monte Carmélo.
Sebáste, in Arménia, sanctórum Mártyrum Athenógenis Epíscopi, et decem discipulórum ejus, sub Diocletiáno Imperatóre.
Tréviris sancti Valentíni, Epíscopi et Mártyris.
Córdubæ, in Hispánia, sancti Sisenándi, Levítæ et Mártyris; qui a Saracénis, pro Christi fide, jugulátus est.
Eódem die natális sancti Fausti Mártyris, qui, sub Décio Imperatóre, cruci affíxus, quinque diébus in ea vixit, ac demum, sagíttis confóssus, migrávit in cælum.
Santis, in Gállia, sanctórum Mártyrum Rainéldis Vírginis, et Sociórum ejus, qui a bárbaris, pro Christi fide, cæsi sunt.
Bérgomi sancti Domniónis Mártyris.
Antiochíæ natális beáti Eustáchii, Epíscopi et Confessóris, doctrína et sanctitáte célebris; qui, sub Ariáno Imperatóre Constántio, ob cathólicæ fídei defensiónem, exsílio Trajanópolim Thráciæ pulsus, ibídem in Dómino requiévit.
Cápuæ sancti Vitaliáni, Epíscopi et Confessóris.
Apud Abbátiam Sanctíssimi Salvatóris, diœcésis Constantiénsis, in Gállia, sanctæ Maríæ-Magdalénæ Postel, Fundatrícis Institúti Sorórum Scholárum Christianárum a Misericórdia, a Pio Papa Undécimo in sanctárum Vírginum album relátæ.
Apud Ostia Tiberína, Translátio córporis sancti Hilaríni Mónachi, qui, una cum sancto Donáto, in persecutióne Juliáni Apóstatæ, comprehénsus est, et, cum nollet sacrificáre, demum, fústibus cæsus, Arétii, in Túscia, martýrium sumpsit séptimo Idus Augústi.