Nonis Júnii
_
In Frísia sancti Bonifátii, Epíscopi Moguntíni et Mártyris. Hic de Anglia Romam venit, indéque a beáto Gregório Papa Secúndo in Germániam missus est ut Christi fidem illis géntibus evangelizáret, et, cum máximam ibi multitúdinem, præsértim Frísonum, Christiánæ religióni subjugásset, Germanórum Apóstolus méruit appellári; novíssime in Frísia, a furéntibus Gentílibus gládio perémptus, una cum Eobáno Coepíscopo et quibúsdam áliis servis Dei, martýrium consummávit.
Tyri, in Phœnícia sancti Doróthei Presbýteri, qui, sub Diocletiáno, multa passus est; et, usque ad Juliáni témpora supérstes, sub eo, annum agens séptimum supra centésimum, venerándam senéctam martýrio honestávit.
In Ægýpto natális sanctórum Mártyrum Marciáni, Nicánoris, Apollónii et aliórum, qui, in persecutióne Galérii Maximiáni, illústre martýrium consummárunt.
Perúsiæ sanctórum Mártyrum Floréntii, Juliáni, Cyríaci, Marcellíni et Faustíni, qui omnes, in persecutióne Décii Imperatóris, cápite cæsi sunt.
Córdubæ, in Hispánia, beáti Sáncii adolescéntis, qui, etsi in aula régia educátus, pro Christi tamen fide, in persecutióne Arábica, martýrium subíre non dubitávit.
Cæsaréæ, in Palæstína, pássio sanctárum Zenáidis, Cýriæ, Valériæ et Márciæ; quæ, per multa torménta, gaudéntes ad martýrium pervenérunt.