Quarto Nonas Maji
_
Apud Ostia Tiberína sanctæ Mónicæ, beáti Augustíni matris, cujus ille præcláram vitam, in libro nono Confessiónum, testátam relíquit.
In metállo Phennénsi Palæstínæ natális beáti Silváni, Gazæ Epíscopi, qui, in Diocletiáni Imperatóris persecutióne, Galérii Maximiáni Cǽsaris mandáto, cum plúrimis suis Cléricis, martýrio coronátus est.
Hierosólymis sancti Cyríaci Epíscopi, qui, cum loca sancta visitáret, ibídem, sub Juliáno Apóstata, cæsus est.
Cameríni sancti Porphýrii, Presbýteri et Mártyris, qui, sub Décio Imperatóre et Antíocho Prǽside, cum plúrimos (in quibus fuit Venántius) ad Christi fidem convertísset, cápite amputátus est.
In metállo Phennénsi Palæstínæ sanctórum trigínta novem Mártyrum, qui, ad metálla damnáti, demum, post adustiónem candéntis ferri et ália torménta, simul cápite cæsi sunt.
Lauréaci, in Nórico Ripénsi, sancti Floriáni Mártyris, qui, sub Diocletiáno Imperatóre, Aquilíni Prǽsidis jussu, in flumen Anísum, ligáto ad collum saxo, præcipitátus est.
Colóniæ Agrippínæ sancti Paulíni Mártyris.
Tarsi, in Cilícia, sanctæ Pelágiæ, Vírginis et Mártyris, quæ, sub Diocletiáno Imperatóre, in bovem ǽneum candéntem inclúsa, martýrium complévit.
Nicomedíæ natális sanctæ Antóniæ Mártyris, quæ, nímium torta et váriis afflícta cruciátibus, áltero bráchio tribus suspénsa diébus, et in cárcere biénnio deténta, ad últimum a Priscilliáno Prǽside, in confessióne Dómini, flammis exústa est.
Medioláni sancti Venerii Epíscopi, cujus virtútes sanctus Joánnes Chrysóstomus, in epístola ad eum scripta, testátas relíquit.
In território Petragoricénsi sancti Sacerdótis, Epíscopi Lemovicénsis.
Hildeshémii, in Saxónia, sancti Godehárdi, Epíscopi et Confessóris, qui ab Innocéntio Papa Secúndo in Sanctórum censum relátus est.
Antisiodóri sancti Curcódomi Diáconi.