Sexto Kaléndas Aprílis
_
Sancti Joánnis Damascéni, Presbýteri, Confessóris et Ecclésiæ Doctóris, cujus dies natális ágitur prídie Nonas Maji.
Drizíparæ, in Pannónia, sancti Alexándri mílitis, qui, sub Maximiáno Imperatóre, post multos pro Christo agónes superátos múltaque mirácula édita, cápitis abscissióne martýrium complévit.
In Illýrico sanctórum Philéti Senatóris, Lýdiæ uxóris, et filiórum Macédonis et Theoprépii, itémque Amphilóchii Ducis, et Crónidæ Commentariénsis; qui, pro Christi confessióne, torméntis plúribus superátis, corónam glóriæ sunt adépti.
In Pérside sanctórum Mártyrum Zanítæ, Lázari, Marótæ, Narsétis et aliórum quinque, qui sub Rege Persárum Sápore, sævíssime trucidáti, martýrii palmam meruérunt.
Salisbúrgi, in Nórico, sancti Rupérti, Epíscopi et Confessóris, qui apud Bávaros et Nóricos Evangélium mirífice propagávit.
In Ægýpto sancti Joánnis Eremítæ, magnæ sanctitátis viri, qui, inter cétera virtútum insígnia, étiam prophético spíritu plenus, Theodósio Imperatóri victórias de tyránnis Máximo et Eugénio prædíxit.