Tértio Nonas Novémbris
_
Medioláni natális sancti Cároli Borromǽi Cardinális, Epíscopi Mediolanénsis et Confessóris, quem, sanctitáte conspícuum et miráculis clarum, Paulus Papa Quintus in sanctórum númerum rétulit. Ipsíus tamen festívitas sequénti die celebrátur.
Eódem die natális quoque sancti Quarti, Apostolórum discípuli.
Vitérbii sanctórum Mártyrum Valentíni Presbýteri, et Hilárii Diáconi, qui, in persecutióne Maximiáni, ob Christi fidem, cum saxi póndere in Tíberim præcipitáti et inde ab Angelo divínitus erépti, demum, abscíssis cervícibus, corónam martýrii percepérunt.
Cæsaréæ, in Cappadócia, sanctórum Mártyrum Germáni, Theóphili, Cæsárii et Vitális; qui, in persecutióne Deciána, óptime duxérunt martýrium.
Cæsaraugústæ, in Hispánia, sanctórum innumerabílium Mártyrum, qui, sub Hispaniárum Prǽside Daciáno, mirabíliter occubuérunt pro Christo.
In Anglia sanctæ Wenefrídæ, Vírginis et Mártyris.
In monastério Clarævallénsi, in Gállia, deposítio sancti Malachíæ, Connerthénsis in Hibérnia Epíscopi, qui multis virtútibus suo témpore cláruit; cujus vitam sanctus Bernárdus Abbas conscrípsit.
Eódem die sancti Hubérti, Tungrénsis Epíscopi. 
Viénnæ, in Gállia, sancti Domni, Epíscopi et Confessóris. 
Item deposítio sancti Pirmíni, Meldénsis Epíscopi. 
Urgéllæ, in Hispánia Tarraconénsi, sancti Hermengáudii Epíscopi.
Romæ sanctæ Sílviæ, matris sancti Gregórii Papæ.