Décimo séptimo Kaléndas Novémbris
_
Sanctæ Hedwígis Víduæ, Polonórum Ducíssæ, quæ prídie hujus diéi obdormívit in Dómino.
In monastério Dervénsi, in Gállia, sancti Berchárii, Abbátis et Mártyris. 
In Africa sanctórum Mártyrum ducentórum septuagínta, páriter coronatórum.
Ibídem sanctórum Martiniáni et Saturiáni, cum duóbus eórum frátribus; qui, témpore Wandálicæ persecutiónis, sub Rege Ariáno Genseríco, cum servi essent cujúsdam Wándali, et a sancta Máxima Vírgine, ipsórum consérva, ad Christi fidem convérsi fuíssent, omnes ab hærético illórum dómino, pro constántia fídei cathólicæ, primum nodósis fústibus cæsi sunt et usque ad ossa laniáti. Sed, cum talia multo témpore pateréntur, et sequénti die nihilóminus redderéntur semper incólumes, exsílio tandem relegántur; ubi, cum multos barbarórum ad Christi convertíssent fidem, et a Románo Pontífice Presbýterum aliósque minístros, qui eos baptizárent, obtinuíssent, novíssime, vinctis pédibus post terga curréntium quadrigárum, inter spinósa loca silvárum jussi sunt páriter interíre. Máxima vero, post multos superátos agónes divínitus liberáta, in monastério, multárum Vírginum Mater, sancto fine quiévit.
Item sanctórum Saturníni, Nérei et aliórum trecentórum sexagínta quinque Mártyrum.
Colóniæ Agrippínæ sancti Elíphii Mártyris, sub Juliáno Apóstata.
In território Bituricénsi sancti Ambrósii, Epíscopi Caturcénsis.
Mogúntiæ sancti Lulli, Epíscopi et Confessóris.
Tréviris sancti Florentíni Epíscopi.
Apud Arbónam, in Germánia, sancti Galli Abbátis, qui fuit discípulus beáti Columbáni.
Muri, in Lucánia, sancti Gerárdi Majélla Confessóris, Láici proféssi Congregatiónis a sanctíssimo Redemptóre nuncupátæ, quem, miráculis clarum, Pius Décimus, Póntifex Máximus, Sanctórum albo accénsuit.