Sexto Idus Septémbris
_
Natívitas beatissimæ semper Vírginis Genitrícis Dei Maríæ. 
Sancti Hadriáni Mártyris; cujus dies natális quarto Nonas Mártii recensétur, sed festívitas hac die, qua sacrum ejus corpus Romam translátum fuit, potíssime celebrátur.
Valéntiæ, in Hispánia Tarraconénsi, natális sancti Thomæ a Villa Nova, ex Eremitárum sancti Augustíni Ordine, Epíscopi et Confessóris, insígnis propter flagrántem in páuperes caritátem; qui ab Alexándro Papa Séptimo in Sanctórum númerum adscríptus est. Ipsíus autem festum décimo Kaléndas Octóbris celebrátur.
Alexandríæ sanctórum Mártyrum Ammónis, Theóphili, Neotérii et aliórum vigínti duórum.
Antiochíæ sanctórum Timóthei et Fausti Mártyrum.
Gazæ, in Palæstína, sanctórum Mártyrum fratrum Eusébii, Néstabi et Zenónis; qui, témpore Juliáni Apóstatæ, irruénte in eos turba Gentílium, discérpti atque necáti sunt.
Ibídem sancti Néstoris Mártyris, qui sub eódem Juliáno, ab iísdem Gentílibus furéntibus sævíssime cruciátus, emísit spíritum.
Romæ sancti Sérgii Primi, Papæ et Confessóris.
Frisíngæ sancti Corbiniáni, qui fuit primus ejúsdem civitátis Epíscopus. Hic, a sancto Gregório Secúndo Pontífice ordinátus et ad prædicándum Evangélium missus, úberes fructus in Gállia et Germánia rétulit, ac demum, virtútibus et miráculis clarus, in pace quiévit.
Carthágine nova, in América meridionáli, sancti Petri Claver, Sacerdótis e Societáte Jesu et Confessóris; qui mira sui abnegatióne et exímia caritáte Nigrítis in servitútem abdúctis, annos ámplius quadragínta, óperam impéndens, tercénta fere eórum míllia Christo sua ipse manu regenerávit; et a Leóne Décimo tértio, Pontífice Máximo, in Sanctórum númerum relátus est, ac dein étiam cæléstis Patrónus peculiáris sacrárum ad Nigrítas Missiónum constitútus et declarátus.