Quarto Nonas Septémbris
_
Sancti Stéphani, Regis Hungarórum et Confessóris; qui décimo octávo Kaléndas Septémbris obdormívit in Dómino.
Romæ sanctæ Máximæ Mártyris, quæ, simul cum sancto Ansáno Christum conféssa, in persecutióne Diocletiáni, dum fústibus cǽditur, réddidit spíritum.
Pámiæ, in Gállia, sancti Antoníni Mártyris, cujus relíquiæ apud Ecclésiam Palentínam, in Hispánia, magna veneratióne asservántur.
Item sanctórum Mártyrum Diomédis, Juliáni, Philíppi, Eutychiáni, Hesýchii, Leónidæ, Philadélphi, Menalíppi et Pantágapæ; quorum álii igne, álii aqua, ense álii et cruce martýrium complevérunt.
Nicomedíæ sanctórum Mártyrum Zenónis, atque Concórdii et Theodóri, filiórum ejus.
Lugdúni, in Gállia, sancti Elpídii, Epíscopi et Confessóris.
In Picéno item sancti Elpídii Abbátis, cujus nómine óppidum est appellátum, quod ejus sacrum corpus se possidére congáudet.
In monte Sorácte sancti Nonnósi Abbátis, qui ingéntis molis saxum oratióne sua tránstulit, aliísque miráculis coruscávit.
Eódem die Commemorátio sanctórum Mártyrum germanórum Evódii, Hermógenis et Callístæ; de quibus, in Syracusána Sicíliæ urbe martýrium passis, ágitur étiam séptimo Kaléndas Maji.
Lugdúni, in Gállia, Translátio sanctórum Justi, Epíscopi et Confessóris, ac Viatóris, qui ejus fúerat miníster; quorum natális dies respectíve prídie Idus Octóbris et duodécimo Kaléndas Novémbris recensétur.