Séptimo Kaléndas Augústi
_
Dormítio sanctæ Annæ, quæ mater éxstitit Immaculátæ Vírginis Genitrícis Dei Maríæ.
Philíppis, in Macedónia, natális sancti Erásti, qui, illic a beáto Paulo Apóstolo relíctus Epíscopus, ibídem martýrio coronátus est.
Romæ, via Latína, sanctórum Mártyrum Symphrónii, Olýmpii, Theodúli et Exsupériæ; qui (ut in gestis sancti Stéphani Papæ légitur), ígnibus combústi, martýrii palmam adépti sunt.
In Portu Románo sancti Hyacínthi Mártyris, qui, primo in ignem injéctus, deínde in profluéntem præcipitátus, illǽsus evásit; post hæc, sub Trajáno Imperatóre, a Leóntio Consulári percússus gládio, vitam finívit. Ipsíus corpus Júlia Matróna in prǽdio suo, juxta Urbem, sepelívit.
Verónæ sancti Valéntis, Epíscopi et Confessóris.
Romæ sancti Pastóris Presbýteri, cujus nómine Títulus exstat in Vimináli, apud sanctam Pudentiánam.
In monastério sancti Benedícti, in agro Mantuáno, sancti Simeónis, Mónachi et Eremítæ, qui, multis miráculis clarus, in senectúte bona quiévit.
Lúere, in diœcési Brixiénsi, sanctæ Bartholomǽæ Capitánio, Vírginis, Institúti Sorórum a Caritáte Fundatrícis, puéllis instituéndis præcláræ, quam Pius Papa Duodécimus albo sanctárum Vírginum adscrípsit.