Sexto Idus Júlii
_
Romæ pássio sanctórum septem Mártyrum fratrum, filiórum sanctæ Felicitátis Mártyris, id est Januárii, Felícis, Philíppi, Silváni, Alexándri, Vitális et Martiális, témpore Antoníni Imperatóris, sub Præfécto Urbis Públio. Ex ipsis vero Januárius, post virgárum vérbera et cárceris maceratiónem, plumbátis occísus; Felix et Philíppus fústibus mactáti; Silvánus præcipítio interémptus; Alexánder, Vitális et Martiális capitáli senténtia puníti sunt.
Item Romæ sanctárum Vírginum et Mártyrum Rufínæ et Secúndæ sorórum, quæ, in persecutióne Valeriáni et Galliéni, torméntis subáctæ sunt; atque ad últimum, cum álteri caput illísum esset gládio, et álteri cervix cæsa, migrárunt in cælum. Ipsárum vero córpora in Basílica Lateranénsi, prope Baptistérium, débito honóre servántur.
In Africa sanctórum Mártyrum Januárii, Maríni, Nabóris et Felícis, qui gládio decolláti sunt.
Nicópoli, in Arménia, sanctórum Mártyrum Leóntii, Maurítii, Daniélis et Sociórum; qui, sub Licínio Imperatóre et Lýsia Prǽside, várie excruciáti, tandem, in ignem conjécti, martýrii cursum confecérunt.
In Pisídia sanctórum Mártyrum Bianóris et Silváni, qui sævíssima pro Christi nómine passi, demum, cervícibus abscíssis, coronántur.
Icónii, in Lycaónia, sancti Apollónii Mártyris, qui per crucem insígne martýrium consummávit.
Apud Gandávum, in Flándria, sanctæ Amelbérgæ Vírginis.