Quinto Kaléndas Júlii
_
In Galátia sancti Crescéntis, qui fuit beáti Pauli Apóstoli discípulus. Hic, in Gállias tránsitum fáciens, verbo prædicatiónis multos ad fidem Christi convértit; regréssus vero ad gentem cui speciáliter datus erat Epíscopus, demum, sub Trajáno, cum Gálatas ipsos usque ad finem vitæ suæ in ópere Dómini confirmásset, martýrium consummávit.
Córdubæ, in Hispánia, sanctórum Mártyrum Zóili, et aliórum decem et novem.
Cæsaréæ, in Palæstína, sancti Anécti Mártyris, qui, in persecutióne Diocletiáni, sub Urbáno Prǽside, cum álios ad martýrium hortátus esset et idóla oratióne sua prostrásset, a decem milítibus verberári jussus est; ac tandem, mánibus pedibúsque præcísis, truncátus cápite, martýrii corónam accépit.
Constantinópoli sancti Sampsónis Presbýteri, páuperum exceptóris.
In castro Cainóne, in Gállia, sancti Joánnis, Presbýteri et Confessóris.
Varadíni, in Hungária, sancti Ladislái Regis, qui claríssimis miráculis usque ad diem hodiérnum corúscat.