Sexto Kaléndas Júlii
_
Romæ, in monte Cǽlio, sanctórum Mártyrum Joánnis et Pauli fratrum, quorum primus erat præpósitus domus, secúndus primicérius Constántiæ Vírginis, fíliæ Constantíni Imperatóris, et ambo póstea, sub Juliáno Apóstata, martýrii palmam, cædénte gládio, percepérunt.
Apud Tridéntum sancti Vigílii Epíscopi, qui, cum relíquias idololatríæ pénitus exstirpáre conarétur, ídeo, pro Christi nómine, a feris et bárbaris homínibus percússus lápidum imbre, martýrium implévit.
Apud Valencénas, in Gállia, pássio sanctórum Mártyrum Sálvii, qui éxstitit Engolisménsis Epíscopus, et Supérii.
Córdubæ, in Hispánia, natális sancti Pelágii adolescéntuli, qui, ob confessiónem fídei, Regis Saracenórum Abdaraméni jussu forcípibus férreis membrátim præcísus, martýrium suum glorióse consummávit.
Bellícii, in Gállia, sancti Anthélmi, qui ex majóris Carthúsiæ Prióre, factus est ejúsdem civitátis Epíscopus.
In pago Pictaviénsi sancti Maxéntii, Presbýteri et Confessóris; qui miráculis cláruit.
Thessalonícæ sancti David Eremítæ.
Eódem die sanctæ Perseverándæ Vírginis.