Tértio Kaléndas Júnii
_
Sancti Felícis Primi, Papæ et Mártyris, cujus dies natális tértio Kaléndas Januárii recensétur.
Túrribus, in Sardínia, sanctórum Mártyrum Gabíni et Críspuli.
Antiochíæ sanctórum Syci et Palatíni, qui, pro Christi nómine, multa torménta passi sunt.
Ravénnæ sancti Exsuperántii, Epíscopi et Confessóris.
Pápiæ sancti Anastásii Epíscopi.
Cæsaréæ, in Cappadócia, sanctórum Basilíi et Emméliæ uxóris, qui fuérunt paréntes beatórum Basilíi Magni et Gregórii Nysséni ac Petri Sebasténsis Episcopórum, atque Macrínæ Vírginis. Hi vero sancti cónjuges, témpore Galérii Maximiáni, extórres facti, Pónticas solitúdines incoluére; et post persecutiónem, fíliis suárum relíctis virtútum herédibus, in pace quievérunt.
Híspali, in Hispánia, sancti Ferdinándi Tértii, Castéllæ et Legiónis Regis, ob virtútum præstántiam cognoménto Sancti; qui, fídei propagándæ zelo clarus, tandem, devíctis Mauris, ad cæléste regnum, terréno relícto, felíciter evolávit.
Rotómagi, sanctæ Joánnæ Arcénsis Vírginis, Puéllæ Aurelianénsis appellátæ, quæ cum fórtiter pro pátria dimicásset, tandem, in hóstium potestátem trádita, iniquo judício condemnáta est et igne combústa; atque a Benedícto Décimo quinto, Pontífice Máximo, Sanctórum fastis adscrípta.