Prídie Nonas Maji
_
Romæ sancti Joánnis, Apóstoli et Evangelístæ, ante Portam Latínam; qui, ab Epheso, jussu Domitiáni, vinctus Romam est perdúctus, et, judicánte Senátu, ante eándem portam in ólei fervéntis dólium missus, exívit inde purior et vegétior quam intrávit.
Damásci natális beáti Joánnis Damascéni, Presbýteri, Confessóris et Ecclésiæ Doctóris, doctrína et sanctitáte célebris. Hic, pro cultu sanctárum Imáginum, verbo et scriptis advérsus Leónem Isáuricum strénue decertávit; cujus Imperatóris ob calúmnias cum ipsi Joánni déxtera manus a Saracenórum Príncipe amputáta esset, idem, beátæ Maríæ Vírgini, cujus Imágines defénderat, se comméndans, prótinus déxteram íntegram sanámque recépit. Ejus autem festívitas sexto Kaléndas Aprílis celebrátur.
Cyréne, in Líbya, sancti Lúcii Epíscopi, quem in Actibus Apostolórum sanctus Lucas commémorat.
Antiochíæ sancti Evódii, qui (ut beátus Ignátius ad Antiochénses scribit), primus ibídem a sancto Petro Apóstolo ordinátus Epíscopus, glorióso martýrio vitam finívit.
In Africa sanctórum Mártyrum Heliodóri et Venústi, cum áliis septuagínta quinque.
In Cypro sancti Theódoti, Epíscopi Cyríniæ, qui, sub Licínio Imperatóre, gravíssima passus est, ac tandem, in Ecclésiæ pace, spíritum Deo réddidit.
Carrhis, in Mesopotámia, sancti Protógenis, Epíscopi et Confessóris.
In Anglia sancti Eadbérti, Epíscopi Lindisfarnénsis, doctrína et pietáte insígnis.
Romæ sanctæ Benedíctæ Vírginis.
Salérni Translátio sancti Matthǽi, Apóstoli et Evangelístæ; cujus sacrum corpus, olim ex Æthiópia ad divérsas regiónes et demum ad eam urbem delátum, ibídem, in dedicáta ejus nómine Ecclésia, summo honóre cónditum fuit.