Sexto Idus Aprílis
_
Commemorátio sanctórum Herodiónis, Asýncriti et Phlegóntis, de quibus scribit beátus Paulus Apóstolus in Epístola ad Romános.
Alexandríæ sancti Ædésii Mártyris, qui, sub Maximiáno Galério Imperatóre, cum esset beáti Apphiáni frater, et ímpium Júdicem, quod Deo dicátas Vírgines leónibus tráderet, palam argúeret, idcírco, a milítibus tentus sævissimísque afféctus supplíciis, in mare demérsus est pro Christo Dómino.
In Africa sanctórum Mártyrum Januárii, Máximæ et Macáriæ.
Carthágine sanctæ Concéssæ Mártyris.
Apud Corínthum beáti Dionýsii Epíscopi, qui eruditióne et grátia, quam hábuit in verbo Dei, non solum suæ civitátis et provínciæ pópulos, sed et aliárum provínciarum et úrbium Epíscopos epístolis erudívit; Romanósque Pontífices ádeo cóluit, ut eórum epístolas públice légere in Ecclésia diébus Domínicis consuevérit. Cláruit autem tempóribus Marci Antoníni Veri et Lúcii Aurélii Cómmodi.
Turónis, in Gállia, sancti Perpétui Epíscopi, admirándæ sanctitátis viri.
Ferentíni, in Hérnicis, sancti Redémpti Epíscopi, cujus méminit beátus Gregórius Papa.
Apud Comum sancti Amántii, Epíscopi et Confessóris.