Prídie Kaléndas Aprílis
_
Thécuæ, in Palæstína, sancti Amos Prophétæ, qui ab Amasía Sacerdóte frequénter plagis afflíctus est, atque ab hujus fílio Ozía vecte per témpora transfíxus; et póstea, semivívus in pátriam devéctus, ibídem exspirávit, sepultúsque est cum pátribus suis.
In Pérside sancti Bénjamin Diáconi, qui, cum Dei verbum non desísteret prædicáre, ídeo, sub Isdegérde Rege, arundínibus acútis confíxus únguibus, et spinósa sude per alvum transmíssa, martýrium consummávit.
In Africa sanctórum Mártyrum Theodúli, Anésii, Felícis, Cornéliæ et Sociórum.
Romæ sanctæ Balbínæ Vírginis, fíliæ beáti Quiríni Mártyris, quæ, a sancto Alexándro Papa baptizáta, in sancta virginitáte Christum sibi sponsum elégit; et, post devíctum hujus sǽculi cursum, sepúlta est via Appia, juxta patrem suum.