Quarto Kaléndas Mártii
_
Perge, in Pamphýlia, natális beáti Néstoris Epíscopi, qui, in persecutióne Décii, cum diu noctúque oratióni insísteret póstulans ut grex Christi custodirétur, comprehénsus est, ac, nomen Dómini mira libertáte et alacritáte conféssus, Prǽsidis Polliónis jussu equúleo sævíssime est cruciátus; ac demum, cum se Christo semper adhæsúrum constánter profiterétur, crucis suspéndio victor in cælum migrávit.
Ibídem pássio sanctórum Pápiæ, Diodóri, Conónis et Claudiáni, qui sanctum Néstorem martýrio præcessérunt.
Item sanctórum Mártyrum Fortunáti, Felícis et aliórum vigínti septem.
Alexandríæ sancti Alexándri Epíscopi, gloriósi senis, qui, post beátum Petrum, ejúsdem civitátis Epíscopum, zelo fídei succénsus, Aríum, Presbýterum suum, hærética impietáte depravátum et divína veritáte convíctum, de Ecclésia ejécit; ac póstea, inter trecéntos decem et octo Patres, in Nicǽno Concílio eúndem damnávit.
Bonóniæ sancti Faustiniáni Epíscopi, qui eam Ecclésiam, Diocletiáni persecutióne vexátam, verbo prædicatiónis firmávit et auxit.
Gazæ, in Palæstína, sancti Porphýrii Epíscopi, qui, témpore Arcádii Imperatóris, Marnam idólum ejúsque templum evértit, ac, multa passus, quiévit in Dómino.
Floréntiæ sancti Andréæ, Epíscopi et Confessóris.
In território Archiacénsi, in Gállia, sancti Victóris Confessóris, cujus laudes sanctus Bernárdus conscrípsit.