Duodécimo Kaléndas Mártii
_
Hierosólymis natális sancti Simeónis, Epíscopi et Mártyris; qui fílius Cleóphæ et propínquus Salvatóris secúndum carnem fuísse tráditur. Hic, Hierosolymórum Epíscopus post Jacóbum, fratrem Dómini, ordinátus, et, in Trajáni persecutióne, multis supplíciis afféctus, martýrio consummátus est, ómnibus qui áderant et Júdice ipso mirántibus ut centum vigínti annórum senex fórtiter constantérque supplícium crucis pertulísset.
Apud Ostia Tiberína sanctórum Mártyrum Máximi et Cláudii fratrum, et Præpedígnæ, uxóris Cláudii, cum duóbus fíliis Alexándro et Cútia; qui, cum essent præclaríssimi géneris, omnes, jubénte Diocletiáno, tenti atque in exsílium deportáti sunt, ac deínde, incéndio concremáti, Deo ipsi odoríferum martýrii sacrifícium obtulérunt. Eórum relíquiæ, in flumen projéctæ et a Christiánis perquisítæ, juxta eándem civitátem sepúltæ sunt.
In Africa sanctórum Mártyrum Lúcii, Silváni, Rútuli, Clássici, Secundíni, Frúctuli et Máximi.
Constantinópoli sancti Flaviáni Epíscopi, qui, cum fidem cathólicam Ephesi propugnáret, ab ímpii Dióscori factióne pugnis et cálcibus percússus est, et, in exsílium actus, ibídem post tríduum vitam finívit.
Toléti, in Hispánia, sancti Helládii, Epíscopi et Confessóris, qui a sancto Ildefónso, Toletáno Epíscopo, multis láudibus celebrátur.