Octávo Idus Februárii
_
Sancti Titi, Epíscopi Creténsium et Confessóris, cujus dies natális occúrrit prídie Nonas Januárii.
Cæsaréæ, in Cappadócia, natális sanctæ Dorótheæ, Vírginis et Mártyris; quæ, sub Saprício, illíus Provínciæ Prǽside, primum per equúlei extensiónem vexáta, dehinc palmis diutíssime cæsa, capitáli senténtia ad últimum puníta est. In ejus confessióne Theóphilus quidam scholásticus ad Christi fidem convérsus, et mox equúleo acérrime tortus, novíssime gládio cæsus est.
Eméssæ, in Phœnícia, sancti Silváni Epíscopi, qui, cum eídem Ecclésiæ annis quadragínta præfuísset, tandem, sub Maximiáno Imperatóre, una cum duóbus áliis, objéctus feris membratímque discérptus, martýrii palmam accépit.
Eódem die sanctórum Mártyrum Saturníni, Theóphili et Revocátæ.
Arvérnis, in Gállia, sancti Antholiáni Mártyris.
Atrébati, in Gálliis, sancti Vedásti, ejúsdem civitátis Epíscopi, cujus vita et mors plúrimis miráculis éxstitit gloriósa.
Elnóne, in Gállia, sancti Amándi, Epíscopi Trajecténsis, qui miráculis, cum vivus tum mórtuus, glorióse refúlsit; cujus nómine póstmodum insignítum est óppidum, in quo ille monastérium exstrúxerat et mortálem vitam absólverat.
Bonóniæ sancti Guaríni, Cardinális et Epíscopi Prænestíni, vitæ sanctitáte conspícui.