Quinto Idus Januárii
_
Antiochíæ, sub Diocletiáno et Maximiáno, natális sanctórum Juliáni Mártyris, et Basilíssæ Vírginis, ipsíus Juliáni uxóris. Hæc, virginitáte cum viro suo serváta, in pace vitam finívit; Juliánus vero (postquam multitúdo Sacerdótum et Ministrórum Ecclésiæ Christi, quæ, propter immanitátem persecutiónis, ad eos confúgerat, igne cremáta est), Marciáni Prǽsidis jussu, plúrimis torméntis cruciátus, capitálem senténtiam accépit. Cum ipso étiam Antónius Présbyter, et Anastásius, quem idem Juliánus, a morte suscitátum, grátiæ Christi partícipem fécerat, et Celsus puer cum hujus matre Marcionílla, ac septem fratres, aliíque plúrimi passi sunt.
Smyrnæ sanctórum Mártyrum Vitális, Revocáti et Fortunáti.
In Africa sanctórum Mártyrum Epictéti, Jucúndi, Secúndi, Vitális, Felícis et aliórum septem.
In Mauritánia Cæsariénsi sanctæ Marciánæ Vírginis, quæ, béstiis trádita, martýrium consummávit.
Sebáste, in Arménia, sancti Petri Epíscopi, fílii sanctórum Basilíi et Emméliæ, atque fratris item sanctórum Basilíi Magni et Gregórii Nysséni Episcopórum, ac Macrinæ Vírginis.
Anconæ sancti Marcellíni Epíscopi, qui urbem illam (ut sanctus Gregórius Papa scribit) divína virtúte ab incéndio liberávit.