Pridie Kalendas Januarii
_
Romae natalis sancti Silvestri Primi, Papae et Confessoris; qui Magnum Constantinum Imperatorem baptizavit, et Nicaenam confirmavit Synodum, ac, multis aliis rebus sanctissime gestis, quievit in pace.
Item Romae, via Salaria, in coemeterio Priscillae, sanctarum Martyrum Donatae, Paulinae, Rusticae, Nominandae, Serotinae, Hilariae et Sociarum.
Apud Senonas beatorum Sabiniani Episcopi, et Potentiani; qui, a Pontifice Romano illuc ad praedicandum directi, confessionis suae martyrio eamdem metropolim illustrarunt.
Catanae, in Sicilia, passio sanctorum Stephani, Pontiani, Attali, Fabiani, Cornelii, Sexti, Floris, Quinctiani, Minervini et Simpliciani.
Apud Senonas sanctae Columbae, Virginis et Martyris; quae, igne superato, in persecutione Aureliani Imperatoris, gladio caesa est.
Eodem die sancti Zotici, Presbyteri Romani; qui, Constantinopolim profectus, illic alendorum orphanorum curam suscepit.
Ravennae sancti Barbatiani, Presbyteri et Confessoris.
Rhaetiariae sancti Hermetis Exorcistae.
Eodem die sanctae Melaniae junioris, quae, cum viro suo Piniano, ex urbe Roma discessit, et Hierosolymam profecta est; ibique ipsa inter feminas Deo sacras et vir inter Monachos religiosam vitam exercuit, et ambo sancto fine quieverunt.