Quartodecimo Kalendas Januarii
_
In Mauritania sancti Timothei Diaconi, qui ob Christi fidem, post diros carceres, in ignem conjectus, martyrium consummavit.
Alexandriae beati Nemesii Martyris, qui, primo per calumniam quasi latro Judici delatus, eoque crimine absolutus, mox, in persecutione Decii, Christianae religionis nomine accusatur Aemiliano Judici; a quo, geminatis suppliciis excruciatus, cum latronibus jussus est incendi, Salvatoris deferens similitudinem, qui una cum latronibus pertulit crucem.
Nicaeae, in Bithynia, sanctorum Martyrum Darii, Zosimi, Pauli et Secundi.
Nicomediae sanctorum Martyrum Cyriaci, Paulilli, Secundi, Anastasii, Syndimii et Sociorum.
Gazae, in Palaestina, passio sanctarum Meuris et Theae.
Romae depositio sancti Anastasii Papae Primi, viri ditissimae paupertatis et apostolicae sollicitudinis, quem (ut ait sanctus Hieronymus) diu Roma habere non meruit, ne orbis caput sub tali Episcopo truncaretur; nam, haud multo post ejus obitum, Roma a Gothis capta et direpta fuit.
Antisiodori sancti Gregorii, Episcopi et Confessoris.
Aurelianis, in Gallia, sancti Adjuti Abbatis, prophetico spiritu illustris.
Romae sanctae Faustae, quae fuit mater sanctae Anastasiae, ac nobilitate et pietate exstitit insignis.