Sextodecimo Kalendas Junii
_
Novioduni, in Galliis, sanctorum Martyrum Heradii, Pauli et Aquilini, cum duobus aliis.
Chalcedone sanctorum Martyrum Solochonis et Sociorum militum, sub Maximiano Imperatore.
Alexandriae sanctorum Martyrum Adrionis, Victoris et Basillae.
Eodem die sanctae Restitutae, Virginis et Martyris; quae, in Africa, Valeriano imperante, a Proculo Judice varie torta, et in naviculam pice et stupa refertam, ut in mari combureretur, imposita, tandem, cum in incensores immisso igne, flamma converteretur, in oratione spiritum Deo reddidit. Ipsius corpus cum eadem navicula, Dei nutu, ad Aenariam insulam, prope Neapolim, in Campania, devectum est, et a Christianis magna veneratione susceptum; ac postmodum in ejus honorem Constantinus Magnus Basilicam in ipsa urbe Neapoli erigendam curavit.