Tertio Nonas Maji
_
Romae sancti Silvani Martyris.
Item Romae sanctae Crescentianae Martyris.
Leocatae, in Sicilia, sancti Angeli, ex Ordine Carmelitarum, Presbyteri et Martyris, qui ab haereticis, ob defensionem catholicae fidei, trucidatus est.
Alexandriae sancti Euthymii Diaconi, qui ob Christum quievit in carcere.
Antisiodori passio sancti Joviniani Lectoris.
Thessalonicae natalis sanctorum Martyrum Irenaei, Peregrini et Irenes, qui, ignibus combusti, palmas martyrii perceperunt.
Hierosolymis sancti Maximi Episcopi, qui a Maximiano Galerio Caesare, post oculum effossum pedemque igníto ferro adustum, ad metalla damnatus est; atque, liber inde abire permissus et Ecclesiae Hierosolymitanae praepositus, ibi, confessionis gloria praeclarus, in pace tandem quievit.
Edessae, in Syria, sancti Eulogii, Episcopi et Confessoris.
Arelate, in Gallia, sancti Hilarii Episcopi, doctrina et sanctitate conspicui.
Viennae, in Gallia, sancti Niceti Episcopi, venerabilis sanctitatis viri.
Bononiae, sancti Theodori Episcopi, meritis clari.
Mediolani, sancti Geruntii Episcopi.
Eodem die sancti Sacerdotis, Episcopi Saguntini.