Quinto Kaléndas Januárii
_
In Béthlehem Judæ natális sanctórum Innocéntium Mártyrum, qui pro Christo ab Heróde Rege interfécti sunt.
Lugdúni, in Gállia, item natális sancti Francísci Salésii, Epíscopi Gebennénsis et Confessóris; quem, doctrína et flagrantíssimo in converténdis hæréticis zelo præclárum, Alexánder Papa Séptimus in Sanctórum númerum rétulit, et ipsíus festivitátem quarto Kaléndas Februárii, quo die sacrum illíus corpus Lugdúno Annésium, in Sabáudia, fuit translátum, agéndam esse constítuit. Eum Pius Nonus, Póntifex Máximus, Doctórem universális Ecclésiæ declarávit; et Pius Papa Undécimus ómnibus Scriptóribus cathólicis, qui diáriis aliísve scriptis in vulgus edéndis Christiánam sapiéntiam illústrant ac próvehunt et tuéntur, cæléstem Patrónum dedit seu confirmávit.
Ancýræ, in Galátia, sanctórum Mártyrum Eutýchii Presbýteri, et Domitiáni Diáconi.
In Africa natális sanctórum Mártyrum Castóris, Victóris et Rogatiáni.
Nicomedíæ sanctórum Mártyrum Indis eunúchi, Domnæ et Agapis ac Theóphilæ Vírginum, et Sociórum; qui, in persecutióne Diocletiáni, post longa certámina, divérso mortis génere corónam martýrii sunt assecúti.
Neocæsaréæ, in Ponto, sancti Troádii Mártyris, in persecutióne Décii; cui quidem Troádio agonizánti sanctus Gregórius Thaumatúrgus in spíritu ádfuit, eúmque ad subeúndum martýrium roborávit.
Arabíssi, in Arménia inferióre, sancti Cæsárii Mártyris, qui sub Galério Maximiáno passus est.
Romæ sancti Domniónis Presbýteri.
In monastério Lirinénsi, in Gállia, sancti Antónii Mónachi, miráculis clari.