Undécimo Kaléndas Januárii
_
Romæ, via Lavicána, inter duas Lauros, natális sanctórum trigínta Mártyrum, qui omnes una die, in persecutióne Diocletiáni, martýrio coronáti sunt.
Item Romæ sancti Flaviáni Expræfécti, viri beátæ Mártyris Dafrósæ atque patris beatárum Vírginum et Mártyrum Bibiánæ ac Demétriæ; qui, sub Juliáno Apóstata, pro Christo inscriptióne damnátus, et ad Aquas Taurínas, in Etrúria, in exsílium missus, illic in oratióne spíritum Deo réddidit.
In Ægýpto sanctórum Chæremónis, Epíscopi Nilópolis, et aliórum plurimórum Mártyrum. Horum álii, sæviénte Décii persecutióne, fuga dispérsi, in solitudínibus errántes, a béstiis interémpti sunt; álii fame, frígore ac languóre consúmpti; álii a bárbaris et latrónibus necáti; atque ita omnes, divérso mortis génere, eádem martýrii glória coronáti sunt.
Apud Ostia Tiberína sanctórum Mártyrum Demétrii, Honoráti et Flori.
Alexandríæ sancti Ischyriónis Mártyris, qui, cum ad sacrificándum convíciis et injúriis cogerétur atque contémneret, ídeo, præacúta sude per média víscera transverberátus, neci tráditur.
Nicomedíæ sancti Zenónis mílitis, qui, cum Diocletiánum Céreri immolántem derisísset, proptérea, maxíllis confráctis dentibúsque excússis, cápite truncátus est.
Chicágiæ sanctæ Francíscæ Xavériæ Cabríni, Vírginis, Institúti Missionariárum a Sacratíssimo Corde Jesu Fundatrícis, exímia caritáte, invícta ánimi fortitúdine et humilitáte insígnis, quam Pius Papa Duodécimus Sanctárum catálogo adscrípsit et ómnium emigrántium cæléstem apud Deum Patrónam constítuit.