Prídie Kaléndas Decémbris
_
Apud Patras, in Achája, natális sancti Andréæ Apóstoli, qui in Thrácia et Scýthia sacrum Christi Evangélium prædicávit. Is, ab Ægéa Procónsule comprehénsus, primum in cárcere clausus est, deínde gravíssime cæsus, ad últimum suspénsus in cruce, in ea pópulum docens bíduo supervíxit; et, rogáto Dómino ne eum síneret de cruce depóni, circúmdatus est magno splendóre de cælo, et, abscedénte póstmodum lúmine, emísit spíritum.
Romæ pássio sanctórum Cástuli et Euprépitis.
Constantinópoli sanctæ Mauræ, Vírginis et Mártyris.
Item sanctæ Justínæ, Vírginis et Mártyris.
Romæ sancti Constántii Confessóris, qui, fórtiter Pelagiánis resistens, ab eórum factióne pértulit multa, quæ illum sanctis Confessóribus sociárunt.
Apud Sántonas, in Gállia, sancti Trojáni Epíscopi, magnæ sanctitátis viri, qui, sepúltus in terris, se in cælis vívere multis virtútibus maniféstat.
In Palæstína beáti Zósimi Confessóris, qui, sub Justíno Imperatóre, sanctitáte et miráculis fuit insígnis.