Quarto Kaléndas Decémbris
_
Apud Corínthum natális sancti Sósthenis, ex beáti Pauli Apóstoli discípulis; cujus mentiónem facit idem Apóstolus Corínthiis scribens. Ipse autem Sósthenes, ex príncipe Synagógæ convérsus ad Christum, fídei suæ primórdia, ante Galliónem Procónsulem ácriter verberátus, præcláro inítio consecrávit.
Romæ sancti Rufi, quem, cum omni família sua, Christi Mártyrem Diocletiánus fecit.
In Africa sanctórum Mártyrum Papiniáni et Mansuéti Episcopórum, qui, témpore Wandálicæ persecutiónis, sub Rege Ariáno Genseríco, pro fídei cathólicæ defensióne, candéntibus ferri láminis toto córpore adústi, gloriósum agónem consummárunt. Quo étiam témpore álii novem sancti Epíscopi, scílicet Valeriánus, Urbánus, Crescens, Eustáchius, Crescónius, Crescentiánus, Felix, Hortulánus et Florentiánus, damnáti exsílio, cursum vitæ suæ implevérunt.
Constantinópoli sanctórum Mártyrum Stéphani junióris, Basilíi, Petri, Andréæ, et Sociórum trecentórum et trigínta novem Monachórum; qui, sub Constantíno Coprónymo, pro sanctárum Imáginum cultu váriis excruciáti supplíciis, veritátem cathólicam effúso sánguine confirmárunt.
Neápoli, in Campánia, deposítio sancti Jacóbi Picéni, Sacerdótis ex Ordine Minórum et Confessóris, vitæ asperitáte, apostólica prædicatióne ac plúribus pro re Christiána óbitis legatiónibus præclári; quem Benedíctus Décimus tértius, Póntifex Máximus, Sanctórum fastis adjúnxit.