Séptimo Kaléndas Decémbris
_
Alexandríæ sanctæ Catharínæ, Vírginis et Mártyris, quæ, ob fídei Christiánæ confessiónem, sub Maximíno Imperatóre, in cárcerem trusa, et póstmodum scorpiónibus diutíssime cæsa, tandem cápitis obtruncatióne martýrium complévit. Ipsíus corpus, in montem Sínai mirabíliter ab Angelis delátum, ibídem, frequénti Christianórum concúrsu, pia veneratióne cólitur.
Romæ sancti Móysis, Presbýteris et Mártyris; quem, cum áliis deténtum in cárcere, sanctus Cypriánus per lítteras sæpe est consolátus. Ipse autem Móyses, cum non tantum advérsus Gentíles, sed étiam advérsus schismáticos et hæréticos Novatiános infrácto ánimo stetísset, demum (ut sanctus Cornélius Papa testátur), in persecutióne Décii, exímio et admirábili martýrio decorátus est.
Antiochíæ sancti Erásmi Mártyris.
Cæsaréæ, in Cappadócia, pássio sancti Mercúrii mílitis, qui custodiéntis se Angeli patrocínio et bárbaros vicit, et Décii sævítiam superávit; multísque auctus tormentórum trophǽis, martýrio coronátus migrávit in cælum.
In Æmília, Itáliæ província, sanctæ Jucúndæ Vírginis.