Nono Kaléndas Decémbris
_
Natális sancti Cleméntis Primi, Papæ et Mártyris, qui, tértius post beátum Petrum Apóstolum, Pontificátum ténuit, et, in persecutióne Trajáni, apud Chersonésum relegátus, ibi, alligáta ad ejus collum ánchora, præcipitátus in mare, martýrio coronátur. Ipsíus autem corpus, Hadriáno Secúndo Summo Pontífice, a sanctis Cyríllo et Methódio frátribus Romam translátum, in Ecclésia quæ ejus nómine ántea fúerat exstrúcta, honorífice recónditum est.
Romæ sanctæ Felicitátis Mártyris, septem filiórum Mártyrum matris; quæ, post eos, jubénte Marco Antoníno Imperatóre, decolláta est pro Christo.
Cýzici, in Hellespónto, sancti Sisínii Mártyris, qui in persecutióne Diocletiáni Imperatóris, post multa torménta, gládio cæsus est.
Eméritæ, in Hispánia, sanctæ Lucrétiæ, Vírginis et Mártyris; quæ in eádem persecutióne, sub Daciáno Prǽside, martýrium consummávit.
Icónii, in Lycaónia, sancti Amphilóchii Epíscopi, qui, sanctórum Basilíi et Gregórii Nazianzéni in erémo sócius et in Episcopátu colléga, tandem, post multa quæ suscépit pro cathólica fide certámina, sanctitáte et doctrína clarus, quiévit in pace.
Agrigénti deposítio sancti Gregórii Epíscopi.
In óppido Hasbániæ, in Bélgio, sancti Trudónis, Presbýteri et Confessóris, cujus nómine póstmodum insignítum fuit tum monastérium illic ab eódem Sancto in suis prǽdiis eréctum, tum ipsum óppidum in eo loco paulátim exstrúctum.