Quinto Nonas Octóbris
_
Sanctæ Terésiæ a Jesu Infánte, ex Ordine Carmelitárum Excalceatórum, Vírginis, peculiáris ómnium Missiónum Patrónæ; cujus dies natális prídie Kaléndas Octóbris recensétur.
Romæ, ad Ursum pileátum, sancti Cándidi Mártyris.
Apud antíquos Sáxones sanctórum Mártyrum duórum Ewaldórum, qui, cum essent Presbýteri et Christum ibi prædicáre cœpíssent, comprehénsi sunt a Pagánis et occísi; ad quorum córpora noctu lux multa, diu appárens, et ubi essent et cujus essent mériti, declarávit.
Eódem die sanctórum Mártyrum Dionýsii, Fausti, Caji, Petri, Pauli et aliórum quátuor, qui primum, sub Décio, multa passi sunt, ac demum, sub Valeriáno, ab Æmiliáno Prǽside diu torméntis vexáti, martýrii palmam meruérunt.
In Africa sancti Maximiáni, Epíscopi Bagajénsis, qui, a Donatístis íterum atque íterum sævíssima perpéssus, ex alta dénique turri præcipitátus est, et pro mórtuo derelíctus; sed, póstmodum a transeúntibus colléctus et pia curatióne sanátus, cathólicam fidem propugnáre non déstitit, donec, glória confessiónis clarus, quiévit in Dómino.
Legióne, in Hispánia, sancti Froiláni, ejúsdem civitátis Epíscopi, monásticæ vitæ propagándæ stúdio, beneficéntia in páuperes, ceterísque virtútibus et miráculis clari.
In diœcési Namurcénsi, apud Belgas, sancti Gerárdi Abbátis.
In Palæstína sancti Hesýchii Confessóris, qui fuit sancti Hilariónis discípulus et in peregrinatióne sócius.
Savónæ, in Ligúria, sanctæ Maríæ Joséphæ Rosséllo, Institúti Filiárum Nostræ Dóminæ a Misericórdia Fundatrícis, quam, caritátis opéribus præcláram, Pius Papa Duodécimus sanctis Virgínibus adnumerávit.