Quartodécimo Kaléndas Octóbris
_
Auximi, in Picéno, sancti Joséphi a Cupertíno, Sacerdótis ex Ordine Minórum Conventuálium et Confessóris; quem Clemens Papa Décimus tértius in Sanctórum númerum rétulit.
In Chálcide Grǽciæ natális sancti Methódii, qui prius Olýmpii, in Lýcia, et póstea Tyri, in Phœnícia, éxstitit Epíscopus, sermónis nitóre ac doctrína claríssimus; atque, ad extrémum novíssimæ persecutiónis (ut scribit sanctus Hierónymus), martýrio coronátus est.
In território Viennénsi sancti Ferréoli Mártyris, qui, cum esset tribuníciæ potestátis, jussu impiíssimi Prǽsidis Crispíni tentus, et primo crudelíssime verberátus, deínde, gravi catenárum póndere onústus, in tetérrimum cárcerem trusus est; unde, solútis Dei nutu vínculis et jánuis cárceris patefáctis, éxiens, ab insequéntibus íterum est captus, ac martýrii palmam obtruncatióne cápitis percépit.
Item sanctárum Mártyrum Sophíæ et Irénes.
Medioláni sancti Eustórgii Primi, ejúsdem civitátis Epíscopi, beáti Ambrósii testimónio célebris.
Gortýnæ, in Creta, sancti Euménii, Epíscopi et Confessóris.