Tértio Nonas Septémbris
_
Sancti Pii Papæ Décimi, cujus natális dies tertiodécimo Kaléndas Septémbris recensétur.
Corínthi natális sanctæ Phœbes, cujus méminit beátus Apóstolus Paulus ad Romános scribens.
Cápuæ sanctórum Mártyrum Aristǽi Epíscopi, et Antoníni púeri.
Eódem die natális sanctórum Mártyrum Aigúlphi, Abbátis Lirinénsis, et Sociórum ipsíus Monachórum, qui, linguis præcísis oculísque effóssis, gládio obtruncáti sunt.
Item sanctórum Mártyrum Zenónis et Charitónis; quorum alter in lebétem liquáti plumbi conjéctus est, alter in ignis fornácem immíssus.
Córdubæ, in Hispánia, sancti Sándali Mártyris.
Aquiléjæ sanctárum Vírginum et Mártyrum, Euphémiæ, Dorótheæ, Theclæ et Erásmæ, quæ, sub Neróne Imperatóre et Sebásto Prǽside, post multa supplícia, gládio cæsæ sunt, et a sancto Hermágora sepúltæ.
Nicomedíæ pássio sanctæ Basilíssæ, Vírginis et Mártyris; quæ, annos novem nata, cum in persecutióne Diocletiáni Imperatóris, sub Alexándro Prǽside, vérbera, ignes ac béstias divína virtúte superásset, ipsum Prǽsidem ad Christi fidem convértit, ac tandem extra urbem in oratióne spíritum Deo réddidit.
Tulli, in Gállia, sancti Mansuéti, Epíscopi et Confessóris.
Medioláni deposítio sancti Auxáni Epíscopi.
Eódem die sancti Simeónis Stylítæ junióris.
Romæ Translátio sanctæ Serápiæ, Vírginis et Mártyris; quæ passa est quarto Kaléndas Augústi.
Item Romæ Ordinátio incomparábilis viri sancti Gregórii Magni in Summum Pontíficem; qui, onus illud subíre coáctus, e sublimióri throno clarióribus sanctitátis radiis in Orbe refúlsit.