Séptimo Kaléndas Septémbris
_
Sancti Zephyríni, Papæ et Mártyris, cujus dies natális tertiodécimo Kaléndas Januárii recensétur.
Cardónæ, in Hispánia, tránsitus sancti Raymúndi Nonnáti, Cardinális et Confessóris, ex Ordine beátæ Maríæ de Mercéde redemptiónis captivórum, vitæ sanctitáte et miráculis clari. Ipsíus tamen festum recólitur prídie Kaléndas Septémbris.
Romæ sanctórum Mártyrum Irenǽi et Abúndii, qui, in persecutióne Valeriáni, eo quod corpus beátæ Concórdiæ, in cloácam projéctum, leváverant, in eándem cloácam demérsi fuérunt; quorum córpora, a Justíno Presbýtero inde extrácta, in crypta, juxta beátum Lauréntium, sepúlta sunt.
Apud Albintimélium, Ligúriæ civitátem, sancti Secúndi Mártyris, viri spectábilis et Ducis ex legióne Thebæórum.
Bérgomi sancti Alexándri Mártyris, qui, et ipse unus ex eádem legióne, cum nomen Dómini Jesu Christi constantíssime faterétur, cápitis abscissióne martýrium complévit.
Apud Marsos sanctórum Simplícii, et ejus filiórum Constántii et Victoriáni, qui, sub Antoníno Imperatóre, várie primum excruciáti, tum demum, secúris ictu percússi, martýrii corónam adépti sunt.
Nicomedíæ pássio sancti Hadriáni, e Probo Cǽsare progéniti, qui, Licínio persecutiónem in Christiános commótam éxprobrans, ab eódem jussus est occídi. Ipsíus corpus Domítius, Byzántii Epíscopus, ejus pátruus, in ipsíus civitátis subúrbio cui nomen Argyrópolis, sepelívit.
In Hispánia sancti Victóris Mártyris, qui pro Christi fide, a Mauris occísus, martýrii coróna donátus est.
Cápuæ sancti Rufíni, Epíscopi et Confessóris.
Pistórii, in Túscia, sancti Felícis, Presbýteri et Confessóris.
Pódii, in diœcési Pictaviénsi, sanctæ Joánnæ-Elísabeth Bichier des Ages, Vírginis, Congregatiónis Filiárum a Cruce una cum sancto Andréa Hubérto Fournet Fundatrícis, jugi mortificatióne et vitæ innocéntia claræ, quam Pius Papa Duodécimus sanctárum Vírginum fastis accénsuit.